JALUO dot KOM

MEDWA PACHI; WuonAbila@jaluo.com 

DUOKO BARUP OMONDI

Jandiko; Mig. Wayoga

Wuon Abila,

Bala kor guok wuon abila, an Wayoga Ja-Lwanda  yo-Kasgunga piny rech gi kuon kobali kata bend ochuti ondiegono maka sama oseyieye ewi mesa gi Mbuta to Ja-ramba ter ri mos dipoka ituro otonje kuom samaki.

Asomo barup Omondi Patrick Odhiambo (got ler kani mabor) masani koro Jo-Amerka owinyo mana  yo piny Osama  ja-mach piere tindo kendo wuod ka nyigolo ojal ma  ne obiro   mondo otiegre odog okony piny LUO sani koro nyieno odonjoe mak olwer? Gitere kanyand guogi  ei rogo mag gode Afuagnesatan mondo odhich tike ragot oko.

An gima anyalo wacho ne yawa, walemuru ne Omondi nikech piny cha mach pilore kata gweno ok nyal tony. Nyieno ooro kwayo mondo wakwane Obong'o Nyakalaga kod Adikinyi dayo omede ndalo. 

Kata an ma koro apiago dhoga kaeni, ndalo moro kanyo  omwom mar dhi  sikul ne obara ndasi. Bang' ndalo machuok cha to aromo kod Ja-keya moro morwako ogut pekles ma mil ka opanga ma Mirogi kata ka ichung' Pala but ndara to neno kata gi Mbita. Ajambane bende ne ler ka mar Ja-meli. 

Otoyono ne omako wang'a kendo tijno ne olomba mi ne wa wuoyogo kod rabalano kuom seche mathoth ahinya kendo ne onyisa ni en ja kirunda mar jogo madwa dhi e lweny mondo oked ne piny mor kich. Ni jogo ma ochiwore kedo ne mo imiyo omwom dabal mar dhi e sikul to kendo pod in kod omwom dabal mar chamo raha kata ng'iewo nyamburko ma ponde ger.

Ka luwore kod kaka an bende a rawuoyi mane odhoth kendo ochamo mbuta kod nyamami, ondiek wuod Okelo majoni rawo okalo adwoda dwaro jo-lisasi, tijno ne mora ga kabisa kendo ne agombe sidang'. Thuolono ne ok anyal weyo jogi ne otera e tiegruok mar keya. Georgia ka ni tiere kar tiegruok mar dho- kani emane kitiege Jerry Rawlings wuod Jo-Ghana.

Kendo ka ne adonjo kanyo ne majoni orwaka kod mor mathoth mi ne abedo kod chir gi mijing'o. Kinyne to Onunga wuod Achieng' osemondo ma oolo pi mang’ich ewiya ni kech ayula ne atomo tom kisumo. Bang'e ne aneno gi e lek ni achimo kama koro ngimana ok en mara e bwo tend onunga  jatok kodera  ojal ma ohero dhawo ka kich to mo bende otimogo dimodho.

Jogi ka in ng'ama  gineno ka odhoth nyaroya to mo iling'ie mana kod wiyi mondo inyodh kaka idwaro mana ka iyie keto seyi  mar keyi mel ni dhawo go to e pi ma ulwokorugo. Ne alunyo ng'wech  pusu kanyibola malal nono. Sani to tinde giketa kachero ogul mama malawo jo-nyasore to seche moko  yawa ma jo-nyasorego kilawo nyalodia to gi pilo mach  ma liro it. Sani koro aparo mana kaka anyalo puso ng'wech kendo tienda gima achamo atwoni. Omondi Patrick onego opus ng'wech radar. Bang' higni ariyo  oyieni keto seyi mar dok e gweng'. Omondi Patrick kik we ndalono kadhi.

Wayoga

Nyakwar Seko gOrwa

Albany, GA.

JOKA NG’ATO GI TIMGI

Jaduong' Wuon Abila,
Ahero mar medoe pacha ma nyadundo e wach ma mitni kaka aneno ka Ajuoga Odhoji otemo kete.An awuon to ka awinjo jomoko ma wacho ni yawa otem loko kitgi moko to wachno tamore donjo na maber,ok ane gima watimo mopogore ahinya gi ma jomoko timo.To kata kamano wayie ni eeee….! to nikech nitie moko ma gin kitwa ok ni gin fuwo lakini ne oketgi kaka ogaye marwa mondo mi ji kik tim timbe moko ma mono kata timbe makelo chien kata kelo rach ne joka ng'ato.

Omiyo oganda koganda nikod kit gi ma gayogi. Mak mana ni ose gik e kinde ma joma ng'eny nitie ma kinde margi mar dongo othoro bedo oko mar ogandagi koro otemo mana ng'eyo ma oko kono to jogo konyise ni ma koru to rach to en okawe mana kamano. Onge tim Luo kata kit Luo ma ok owinjore kata achiel.

Bende onge gima jogewa timo ma ng'ato nyalo wacho ni medo tho mar ayaki, oooyo...!  ayaki nie  piny tee kendo oganda ma kedo matek kod kitwa go kaka Atwara (jo-rabuon) kod jokopere moko to ok ginyal nyisowa gimomiyo jogegi bende tho athoya ka yawa, chiemo e kar liel e chakruokne ne ok en mar mor kata mar owuora moro, oooyo ne ne mar bedo gi weg chandruok machiegni kendo riwo luedo ma nyalo miyo kata joma yande ne ok modhre pi to nyalo sudo machiegni gi yagi e saa mar chandruok kendo riwore achiel, bedo kod chi wadu ne en mar miyo jal ma dhako gima jorachar luongo ni "emotional security" kendo miyo nyithind jago moselal bedo kod ng'at ma gineno kaka wuoro.

Kata e muma ondiki ni ka dichuo otho oweyo dhako to yuore ema nyaka tere, jo-din unyalo medo somo (Rapar Mar Chik 25: 5-10), nikech kata mana jo-Israel bende ne nigi chikegi to duto chalre. (Wuon Abila).

To nikech kaka dhano jal ma obedo machiegni kod dhako no ne nyalo riwore kode kaka chiege mar tieko ne dwaro mar ringruok nikech tek bedo machiegni gi ng'ato ma inyalo miye kony eyore mopogore opogore to ng'ato biro bedo kode e achiel moa oko. Omiyo kit chike Jowa to ok rach kendo kaka Ajuoga wuon Odhoji otemo kele chike gi bende lokore kaka piny lokore (they are dynamic).

Omiyo kik wakaw ni ma ji wachogo kata joma temo chayowa ok margi ber maloyo marwa.Oganda moko kaka Atwara onge chike gin kaka "Nyakeru" ne jokeyogi chike gi be ne oke kamano. An aparo ni ok wan marach e chikewa. Mak mana ni tuo to nie piny kendo odhi marach to duto Ruoth Nyasaye ema enonyalnwa, wan kaka dhano wa wacho kendo watemo mathoth to Jehova Nyasaye ema eno tieke. Omiyo lemo to nyaka wana lemuru ok ne tuo kende to ne anjawo kod weche mathoth mose donjo e piny. Dalawa maduong' nyorobi buore kwe onge kiwuotho to iluor aluora nikech
jomecho, jo mahundu kod jonjore odhuro. Ruoth ema enolonwa. Jotelo ma saa gi orumo be ok dwar aa,joma onego nyiswa yoo bende dwaro mana ne igi....odhuro yawa aweyou kamano.

Wuodgi Sara Mijungu Nyar Kachuodho.

Ana miyi sigana matin kende kuom mamani ne en chi Kadem jaod Mifuong'o ma min Owuonda Kuba. En e ruoth ma dhako mokuongo tiyo e piny Luo ka Jo rachar odonjo e piny. Nenore ni otiyo kar higa 1905 nyaka 1912 eka oweyo ne wuode ma Owuonda ema otero ji e bita mokuongo.

An kod matin kuome to ka use yudo wachne moro to ang'e kapodi to amedi wach. Nonro mara en:Mjackoyo@hotmail.com

An iluonga ni Roberts Mijungu Makajackoyo wuod Karungu Sori,sani to anie dala mar Dar es Salaam,TZ.

MEDWA PARO; WuonAbila@jaluo.com

© 2002, JALUO dot KOM