JALUO dot KOM

GERRUOK E PINY LUO

Jandiko; Mig. Joshua Omoga,

Atimo erokamano ne nyikwa Ajwang duto ma otiyo matek momiyo wanyalo romo kendo pimo wechewa e yo mar mbuyu kata a kor odundu kama.

En atwa maduong' kendo nyisore ratiro ni Jokanyanam temo matek. Machuok to daher loso e oboke mar nyadendi ma nyar Nyakach manyocha otwakgo e wach mar " Gerruok e piny Luo". Adagi ngang' akwede mare to gi mag luowa mamoko mapodi oramo ni ayaki ok en wach maduong’ ahinya kuom tho to gi dongruok mar anywola mar Luo e kinde ma wantiereni.

Adier ber, kendo gima owachi ema romo. Adier  en kuon okaka, kendo thoth ji oluore.  Ayaki to okwako pinje te, to kata kamano Kanyanam kae to ohwaore. Osiepena madhoudi mamoko goyowago siboyi ni jaluo ohero rech to bang’e ka dende hinge to itieko e gombo mag ringruok, ahinya to chode to gi kelo lweny ! Ok nen maber kata matin !

Adier tuoche moko to nitie kendo chan koda dhier monowa nuango konyruok e tuoche ma inyalo kata medo remo kata mana pi to dhano tiyo tije; Kata kamano wach mar yien kod osubtal to mana mahaya. Kanyanam ogerore maloyo pinje kaka mag Atol  motimo ong'arocha, to kata mag Jolumba malo e tien godeka to Ayaki to odwa chayoe Jaluo ahinya.., Ayaki ochayo od thieth kendo kata ruiro ok chalne gimoro. An gima ang’eyo ma ayaki oluoro en mana Jawar, Akonya ma wuod Meri, to kod ritruok kuom wach mar chode.

Anywola to dwaro ni  ka podi en rawera to oloso nyaka "timetable" (chenro) mar nyiri malime, to kendo iketogi e (rank) okang’..! Ka dhako kata dichuo otho to iyike to kendo iduogo e boma to ngima dhimana mbele ma onge kudo muya. Dhano oluoro pimore  to ringruok to ohingoji, bende Jaluo  ok ong’eyo ni sama in gi midekreno inyalo pogo ji duto ma iriworigo e yor ringruok. Kaka ngwen ma ochimo e pony, wadhi mana ni yawa dhi kode !

"OLIK TIGA ERO ULIERO KA WITHU ORANGO PINY, TO AN KA TEKU OLOKORE, TO KIK UDWAR JOJUOG MOYIROU"

En adier ni jamidekre kamedo riwore gi ji e yor ringruok to omedo licho tuono, kendo ndalone bende ong’ado owuon. nyikwa ramogi, anto awacho ni kata ae watem dongruok mi walos gwenge kendo wapuonj nyithiwa maber, to ni ka ok waloko pachwa  mi wayie ni ayaki to yueyowa, to mano kanono.Jasigu maduong’ mar dongruok ma ji duto kedogo sani en mana EN. "Kik wakan pesa e ndede motuch".

  "Apouyo motang' ema ru", omiyo kata chan nitiere, dak abal to nengone tek. Ayaki to nitiere, kendo ong'amo dhoge ni ji madende gi nyinge mag batisim kaka Chira, Wichbar,gi mamoko, en nyinge hie to en MATIEKA.

  An Joshua omoga

  Beloved, I wish above all things that thou mayest prosper,
and be in health, even as thy soul prospereth.
3John 1:2.

©2002, JALUO dot KOM