JALUOdotKOM

AGAJA
KUYO

BARUPE

WECHE DONGRUOK

MBAKA

NONRO

JEXJALUO

NGECHE LUO

GI GWENG'

THUM

TEDO

LUO KITGI GI TIMBEGI

SIGENDNI LUO

NYIKWA RAMOGI

THUOND WECHE

Nwang' e-mail ka jaluo.com

Nyikwa Ramogi Ajwang' Ochieng' Nelly Nyocha Oweyowa gi Lit, Kata Kamano Duonde to Osiko Kodwa, Inyalo Ng'iewo thum Dr. Nelly Kod Ma moko, Yud Mathoth e od Thum marwa

BENDE JALUO NYALO KAWO LOCH? Joka Nyanam wachni chando chuny joluo duto kamoro amora ma gin tie, nito bende wanyalo kawo loch mar Kenya? Ndalo koro okayo machiegni, higa mabiro dhano biro luto ombulu mar yiero Ker manyien kod wajumbe mage. Inyalo jiwo tiend wachni ornwa pachi ei ABILA

Asebedo kaparo ahinya kuom timbe joluo kaluwore gi ng'eyo to gi chik mar Nyasaye. Ma ema omiyo sani katieko somo weche ma migosi Ogello Mak'Okullo ondikonua kaluwore gi NG'EYO MATUT KUOM
NYASAYE KA WASUNGU POK OBIRO E PINY LUO, daher mar wacho ni:

JOLUO POK OMAKO CHIKE KRISTO

Ka Jaramogi Oginga Odinga (onind gi gue), ne owacho ni Kenya pok oyudo ohuru, an dawach ni joluo mathoth pok omako chik bedo ja Kristo. 

An kaka jaluo kendo ja Kristo (jakatholik), asebedo kahum nono kawinjo kendo kaneno timbe joluo moko mawacho ni gin jo kristo to kata kamano kaka gidak kendo gik ma gitimo gin gik mag maundu mapiny ne okuedo koa chon. Ogello wacho ni Nyasach joluo en Nyasaye ma kumo joma timo marach. Kata kamano, ka ngi'yo maber timbe joluo to moloyo weche modok kuom gima iluongo ni Ndagla, Nawi kata Nek ka iloko kata ioro gigo maricho mondo ohiny ng'amachielo, wanyalo penjore ni: Joluo matimo timbegi be gin jokristo gadiera?

Kane pod atin ne ajawinjo ka jodongo gweyo ka wacho ni "Jaluo mar omera jaluo rach - Jaluo mar omera jaluo rach...". Jokristo ong'e ni gin joma chunygi ler kendo makonyo jogo man e chadruok. Kata kamano, ich lit man e piny luo ok wachi. Ji duaro mana makorgi to "kech maka owadgi ok mone nindo". Mano ok e kende.

Jaluo iwacho ni oyie konyo jamua to ok jaluo wadgi "mabiro loye". Kapod amedo ewi mano, joluo gin joma onge gi erokamano. Wachore ni ka ikonyo ng'ato e piny luo to nyingi dhi ni "wuod ng'ane gini tinde joma omewo". Joluo gogo wacho ni kuom ranyisi ka ng'ato okuayi pesa, kimiye to ikunyo mana buri. Nang'o? Nikech pesanini idhi kingigo kendo irundigo. Mano ema omiyo jomoko wacho ni ok ginyal konyo jomoko nikech kar goyo erokamano kendo pako Ruoth Nyasaye ni wuod oganda wa owuok kendo nyalo konyo, gima itimo en duaro kaka inyalo tieki. Ere dongruok e piny Luo? Ere hera modego jokristo bedgo? Ere yie magin go kaka jokristo? (Wang' mikudho ema gawi/Chiero mithiedho ema gawi). Joluo mang'eny nyaka sani ni gi
udi mabeyo e taonde madongo to ka gi dhi dala to gilawo nindo nikech giluor gedo dala nikech ibiro neg gi.

Mathoth bende ni gi mitokni to ka gi dhi dala to giwe mitokgi nikech ibiro ornegi yamo marach. Ere yie kuom Kristo manotho mondo owar wa etimbe marichogi kendo duaro ni mondo wadag e hera? Ere Nyasach Joluo ma jamirima kendo machuado joricho?

Joluo ne timo nyasi margi kendo ne lemo pile ndalo duto e wuok chien'g kendo e podho chien'g (lemo mar okinyi gi lemo mar odhiambo). Dipo ni sani joluo pod lemo motelo ni gimoro amora ma gi dhi timo? To moloyo rawere makawuono mowere ni osomo, be gi lemo kendo gichiwo ni Nyasaye duto ma gibiro timo? Wuothi eka ine! Wich owil gi Nyasaye e kind rawere...

Asebuok ahinya kawinjo jomoko e piny Luo mahedhore ka giwacho ni owargi. Penjo mara en ni owargi kuom ang'o? Piny Luo pod opon'g gi Chira, jojuogi madiko ng'wech kotieno kendo mono ji nindo, moko bende nego
nyithindo gi sioho (juog wan'g), jobilo, jonawi, jonek, jomaundu, jokuo, jomiriambo, to gi mamoko mathoth maok andiko ka. Jokristo moko wacho ni "kodhi marach to gi lonyo Kristo gibolo piny...". Kristo ok en law miruako kendo iwilo kata iloko kaka ng'ato duaro. Bedo jakristo loko ngima ng'ato e yorene duto. 

Ruoth Nyasaye ne oloso kendo owuotho gi ogandane ndalo duto kendo ne ofuenyore negi eyore mathoth: kuom hondni mag piny, kuom johulo to mogik e ndalogi, osefuenyore e wuode mamiderma kendo JawarwaYesu Kristo. Ma ema omiyo joma oseyie kuom Jawarni ok nyal dok chien dwaro Nyasaye e hondni machon kata kuom chike machon nikech ose oronua wuode kendo ose miyowa chike manyien mondo ochop chike machon ka kare. Ka joluo oyie gadieri kuom Kristo gi chikene, piny Luo dibed piny maber adier ma dongruok dhie nyime kendo wasigu dikoro onge e piny Luo maji tiekore nikech onge hera mar Kristo.

Magi to gi mamoko miyo awacho gijing'o ni JOLUO POD OK GIN JOKRISTO kaka owinjore. Wabed uru gi yie madiera kuom Kristo to ok yie mikiko. Kain ja Kristo to penjri ane ni be iyie adier koso iwacho ni iyie to... 
Ruoth Nyasaye oguedhu kendo olok chunyu gihera kendo gadiera.
An OKOTH GORDON.

Ngat man gi wach moro amora kuom ndikoni nyalo medo kata penja e yor e-mail: wuod nyar Kabondo

Kuom Akelo nyar Kager,
Ago erokamano ahinya kuom tich matek ma usetimo mondo uyawnua yo mar lalruok ka uyawonwa oboke mar joluo.com. Ma ne esobedo lekona ema omiyo amor ahinya kayudo thuolo ni e internet. 

An iluonga ni Okoth Gordon wuod Asembo. Ne asomo e skund praimari mar Ujwang'a ei Asembo kendo bang'e ne atieko klas aboro e skund Lieta e piny Uyoma. Bang'e ne adhi nyime gi somo e dala mar Kisumo e skul mar sekondari ma Muslim. Koa kanyo ne adonjo e Seminari mar jo misionari ma Jo Consolata kama ne asomoe weche mag rieko (filosofi). Koa kanyo ne oora e piny mar Colombia (amerika ma milambo) kendo ka ema ase somoe weche mag Nyasaye (Thioloji) kendo achiegni tieko medruok mara e okang' mar mastas.

Ka in gi mari moro ma di wandik ka to orni
Akelo,Nyar Kager 
jaluo@jaluo.com
Daher winjo dwondi in bende, iwinjo?

WENDO MIWA PARO

OD PAKRUOK