kanu280302

JALUO dot KOM

Od Wadu
     
 

PACH JOPINY BANG’ RIWRUOK NDP GI KANU

 Jaduong' Abila, Ajos wuod Atiga,

Maling’ling’ mar KANU gi NDP nyocha oriwore e nyasi ma nyocha wadendo ni Nyasi mar Kisera. E thuoloni iluonge ni KANU MANYIEN, koda ber onyuolo rach kata onyuolo dongruok to wakia,  Amollo omako od goro mongirore, Wuod Odongo omako kom maduong’ kod oganda ma moko.  Yawuotwa oseoronwa pachgi kaka ginene Mig. Olala Omollo kaen piny Norway wacho kama; Ng'ato ka ng'ato koro onego opar ni ombulu ka igoyo gande to en siri. Omiyo gimoro ni kaka joluo waluwo Amollo to wawelando. Nitiere yawuotwa moko Bende kaka Orengo ma pod ni oko mar riwrwok mar KANU kod NDP. Omiyo ka gik moko odhi marach kod jok maluwo Raila to mana wachgi. Ok wanyal ywak ne Moi, nikech wadonjoe kawaneno. Ka waluokore e pi nyang' to mana wach wa. Gomoro ni ji paro dhi ka Museveni to mana mit wach, kata kamano, to kuro bende wanyalo keloe man thagruok marwa. Ombulu en siri, ng'ato ka ng'ato luto mana mare. Olala Omollo ka a e piny mar Norway. omollo@stud.ntnu.no

Kaka ombulu en mana chuny ng’ato owuon Mig. Olala medo leroni ong’e tiende mondo waywagi nikech nyocha wayiero kendwa kendo Moi bende ok wanyal ywakne nimar en herowa wawegi, Bende onge gima omiyo nyaka waring’ pinywa wadhi e piny Kaguta Museveni, Kendo omedo goyo ngero moroni “Nyang’ omi amiya”, nikech ka idhi lwokori to bang’ luok to imori e lwanda e dho wadh, ka nyang’ omaki to ere ng’ama iywakne? Yawuotwa mantie e buche ma moko bende kik wane ni gitimo marach, kik waket tong’ e adita achiel dipo ka gitore giduto!

  Omiyo Orengo bende otem mana kar nyalone dipo ka osumonwa weche bathe kono, Donde bende omak mana kareno mano ema iluongoni demokrasia manyien kama ng’ato timo mana gima chunye omiye mak ochune ni nyaka obed mana ja-Kanu, jodong’ aich moko ma dwaroni nyaka ji bed mana jo-Kanu manyien ni eka thowe nywo kong’o to obayo yo nikech ong’e achune kuom gima ng’ato dwaro timo ne oganda.

  Luo Nyanza e teko Kenya omiyo kik wanind aninda nekech koro wan jo-Kanu gima kiny wakia! Ring’o nyalo lokore Ler!

  Jaluo dot Kom koro sani osebedo kar romo ne Nyikwa Ramogi e piny ngima Mikayi Rachel Oyoko nyoro ooronwa oboke komedo jiwowa kuom tich maber mar yawo kar romo, nowacho ni; Apo mana ka achuanyora e page mar Joluo ma omiya mor kabisa. Ma gima omiyo kawuono odiochienga dhi ruma maber ndii. Koro ang'eyo ni anyalo somo dholuo ma asetieko ne higni mangeny ndi kapok asomo kendo koro ayudo kama anyalo ndike kod dholuo. Mbaka mathoth mag joluo koro ok bi baya, moloyo ka ondikgi gi dhok ma gichakore godo. Erokamano kuom chako gima kama. Med dhi nyime!!  Rachel K.A. Oyoko-Six

  Nyadendi Jenny Adhiambo bende omedowa weche moko kuom wach mar tang’ gi riwruokni, mana kaka ne asenyisou malo kanyo, omedo wacho kama;Paruru Jokanyanam, Amosou ahinya kagenoni ungima nyikwa ramogi. An bende angima. Daher mar goyo erokamano ne Nyasaye kuom ritowa kendo kuom miyowa teko mar bedogi Agwambo Owadgi Akinyi thuon momiyo pinyduto sani koro oluoro nyikwa Ramogi. To kata kamano nyikwa ramogi da med paronu niya wuothuru mos kendo upar ka pok utimo gimoro amora nikech Atwara mabende wadendo ni Jarabuon ok ohero Onagi a nyaka chon.

  Omiyo Dick Waweru manyocha ok dwar Joe Aketch e dala mar City Hall ok nyal wuondo wa ni sani ohero Raila Kodinga mano nyikwa ramogi an to adagi ma. Atwara wetene samoro koro dwaro mondo oti kode go Uhuru Kenyatta mondo gitiek a gwambo.Pareuru kaka Jomo Kenyatta ne otiyo odinga kod kaka ne oti Tom Mboya ma ja Rusinga kaka ne Kikuyu otiyo pareuru Nyikwa ramogi jogi Nyalo nego Agwambo(Raila Odinga). Ean JENNY.

  Wach kuom solo omuom ma nyocha idwaro mondo wasol bende yawuot Luo pod odagi adaga ni kata nade to ok ginyal nimar adieri mar kaka pesa otiyo onge ng’at ma biro ng’eyo kata kamano med winjo wach kaka Mig. Onyango wuod Asembo Mabinju Gasa lero tiende; Ajos,   We amedie matin bende e wach mar solo pesa ni.  Anyuola mang'eny onge gi wach kuom soloni.  To joma riek kaka wan to nyaka penj a penja penjo ma isepenjo go. An daher mar penjo Amollo wuod Oganda ni to Pesa mane joluo ogolo mondo ong'iew Mollasses Plant cha, ne odhi kure?  Wachno biro ketho nying Amollo ka ok orieye maber. Odeny Ngure giri mondo owachie ni jopiny malong'o gima otimore. Erokamano, Onyango Wuod Asembo Mabinju Gasa,Ethiopia

  Paro iye opogore ng’ato paro mana mare, wuod Luo Samo Rabok K’Puora bende omedo wuoyo kuom wach pesa mane osol kod pache kaka onene, okwayo jogo ma suoto umgi ni pesagi nocham achama mondo olernegi kar chung’ mane gigolo mondo omi giduok negi! Nikech Amollo osetimo mathoth kendo madongo ei Luo ma kik ji tem ka tugo atuga gi nyinge kamano. Kendo omedo wacho kama; Wuon Abila, Esa ma asomoe weche mag agwambo kaka gik ma osetimo ne onagi to Jomoko pod penjo pesa mane gisolo ni party, Ng’at ma ok dwar kata ma iye lit, onyiswa ni ne osolo omuom maromo nade mondo waduokne, Owadga Akinyi otimo tich ma ok riw gi kiawa. Onagi duto oseyie to jomibadhi moko machendogo owuogi. Mogik, Lojni wasemako, koro chung’ kar tiendi. Dwarore ni ng’ato ka ng’ato onge pogo mor wich gi norwich gigi ok chal. Agwambo kende Samo rabok K'puora Ayie kod weche ma K’Puora oseporo malogo, mak mana ni jomoko ok ong’eyo nito GE BENDE LOWO KATA NI SE BENDE LUM ka waseyudo pogruok mantie e kind wechego to wabiro yudo adieri mar kuma piny ochomo. Nyikwa Ramogi un thuolo mondo uluw bang’ ng’at ma udwaro kata obedo ni en Orengo kata Ochuodho kata Nyong’o to mano mana mari onge ng’at ma nyalo chuno ng’ato, ombulu en siri mar ng’ato owuon.

  Nyikwa Ramogi medwauru pachu kaka unene; Amor kod pachu uduto. Nyasach Kwere mondo oritu ndalo duto.

WuonAbila@jaluo.com


 © Copyright, 2002, Jaluo dot Kom