loch050802

JALUO dot KOM

Od Wadu
     
 

DHINGO IRO TO E TEDO KUON?

Wuon  abila, Adwaro duoko mig. Ajos  kuom wach Agwambo, Omera, pod wan maber, weche maji wacho koni gi koni kik buogi. Pod ok owuondwa, onge tiende dang'ni. Ka pod ok oketh chik marito Duond kanu, to pod wan maber. Gima duong en ni ne NDP odonjo ei Kanu ma koro lose ka wan ema wapek eiye ka kidi. Oonge gima ngato nyalo timo ka Kajwang okia, Owadgi Akinyi okia to gi jowa mamoko mariek. Kanu to ok wawuogie, watimo limtidi kanyo Joma ok dwar to owuogi wan onagi ok wadhi kamoro, Wabiro ruchore kodgi nyaka tobo.Agwambo pod ema omako wi ruath. Joma chalo Orengo gi Ochuodho, to ka iluwo, to ichalo ngat maluwo luangni to kare teri mana nyaka e choo. Lu bang Kich ma en a Agwambo materi nyaka ei mor kich.

Oritu abiro medou tuak kaka owinjore

Ean Mogenou Samo Rabok K'puora


Kisomo wach Samo K’Puora to iwinjo ka omedo wachoni joluo ema pek ei KANU ka kidi, ato Ker Moi nyoro owacho ang’o Kisumo? Anyisou ni Moi ochayo joluo moloyo e seche ma koro oparoni wan mana joma itugo godo. Kane ochopo mane wuod Seda koro onindo negi wachoni joluo ing’iewo gi siling’ 5'000 kende wang’ni to kare eno wach ang’o? Yawuotwa moko osechako chamo pes remo ma koro iwuoyo ei Luo mondo opog pach jopiny. Kata yawuotwa ma uwinjo wigi obamgo ok obam nono, itiyo kodgi mondo gi pog riwruok man ei Luo. Akwayou ni ka uwinja to mondo kik ulok pachu kuom riwruok mar luto ombulu ne wuodu muyiero kendo udhialo.

Mig. Donde koyie to okwong’ otem loso nyinge e kor gweng’ moloyo lando berne gi long’one e odundu mar http: www.joedonde.com  mago to gin mana ka dhingo iro mak chieg chiemo. Beduru kar tiendu kendo kik omuom ma koro iwuoyo oko ni mondo omi wapogre kel sigu gi anjawo e kindwa.

Wuod Odongo bende wacho maber nito ka owachoni en ng’at moyiero en Uhuru to unto kaka joluo man’gi ombulu alufu gi wiye dak unyise ni un bende wuodui ma uyiero ema…! Owetugo! Hawi maber nokwero wuod Atwara mondo kik bi kode Kisumo dine giwuoro kama orujo-rujo ng’ur ka bunde ma chwado jo-Palestina.


Ajos,

Ayie gi tiend weche mapek ma imulo kanyo no kaluwore gi tungni mantie e dala Kenya ka koro Ker Moi tangni ma odhi koni gi kocha. An nyocha pod ok adwar loso nikech aneno ka Migosi Amolo pod oling' kendo pimo weche gi yamo kuma dhiye. Ma ema omiyo pod an daher mar wacho ni waterre uru mos eka wanee ni to Jalang'oni paro timre kodwa nadi? Ani wang'ni to eka lich. Tugo onge. Jorabuon to ok kaw loch makata tek to kata yot. An to ayie dhi Kamkunji bayo kite to jomahatigi to ok wawenegi thuolo. An aneno ni wuod Odongo chunye thagore kendo opuodore ka ng'at ma dwa tho. Weche nika ariyo: nyalo bet ni ng'atni dwa chulo Otike kaka ne okete e loch nyalhodia to wiye wil ni mano ekaka chik makenya ne wache ni jalup ker ema ne nyaka bed jatelo. Omiyo onge gima ne omiye ka ikonyego. To ka po ni en onene Otike okonye to opar ni sani Kenya ji wigi ni malo kendo wengewa oyawore tee ma ok onyal tugo gi jo piny kagima piny Kenya en mare ma otimogo gima oneno. Mar ariyo, an aneno ni jalang'o! ni  mita dwa kaka oyua oganda jorabuon machiegni mondo omi opog kura nikech wuod jo Othayacha nenre ni pek matin. Koro ema omiyo waket wang'wa eka wane. Amor ka awinjo ka Omamo Kaliech gini kaachiel gi Odeny Ngure gini joting'o duondgi kanyiso jopiny ni kik gigal ni wagalre. Wuod jaduong' to pod onego rit mana dhoge. Kochopo kama iyiere wawuowi madhi ii e pap to wananee ka obuolani makoro Ker Moi temo jolo sani ni nyalo nyago Amolo tinga kidi kibudi.

  Waterreuru mos joluowa kendo wateruru lemb geno. Rembwa kech to kata kamano telo to nyaka watel makata tek nade.

Iya oluda sidang' kaneno kaka Moi wiye tek kendo ochayo sidang'. Ere kaka Moi nyalo chopo ei Kisumo (Show) to mita obukore ni omulo nying wuod Kenyatta to Raila to obet e bathe? Ma ayany mang'ongo e dier dalawa. Ma ok timre ma olam mana Nyasache mane okonye nikech orujre poth ka oyuak e wiye. Wan President wa ma wang'eyo kendo ma wadhiro en mana Wuod Jaramogi kende. Ma doko achaye malich manade?

Hap Obong'o Nyakalaga ni un uduto to moloyo ni jotendwa duto.

An Okoth Wuod Asembo: gordon78@hotmail.com


 Ja-diakon Okoth wuod Nyar Kabondo bende omedo jiwo tiend wach kuom kawo loch bang’ Moi masani ochuowo chieng’ kaluo, Ker Moi to pod yudo pek kuom dhialo wuod Kenyatta kaka ng’at ma nyalo rito Kenya bang’e ka lochne biro rumo e giko higani. Wuod Nyar Kabondo omedo wachoni mano en achaya ka Moi nyalo liethore e nyimji e boma ma Kisumo kendo wacho ni en wuod Kenyatta ema odhialo, mado bende doko tim joka Nyanam? Ayie gi wuod Asembo kuom wachne mak mana ni kik wiwa wil gi mago mosetimore e ndalo mokadho e loch mar KANU onge chieng’ ma jodong aich nomi joluo loch eyo mayot kaka uparono!

Gima onego watim en nito ka wadwaro loch en yo mane monego waluw, to kik waluw bang’ jalang’o ka muofu manyalo nyumore e mach kaok one! Loch mar Kenya  koro onego lare gi thuon, maonge dewo ni Moi nyaka dhial wuodwa moro. Ero loch to wadwaro bende wasepenjore nito rito loch bende yot? Kik waketh sechewa ni wadwaro loch kato ka waseyude to wachako tuge! Mwachegi ok oyie gi loch jaluo kata achiel, omiyo riwruok ma wanyalo riwore kodgi bende ong’e. Ka otamore to kare kik waket korwa e gima oyombowa, kata mar ketho seche kayiem nono!

Wuon Abila


Ajos,

Amoso jadhot gi chuny mamor. Ase bedo kaparo ndalo ka ndalo kaka di wang wakony wuodua ma waegno Amolo Tinga. Ayie kod paro machalo kod mari mondo wachak ORI. Jo piny bende nyaka wangni obed kongeyo ni nyikwa Ramogi bend ormo telo. En obed marach miwuoro ka telo di gwenywa kendo mi po olware ne atwara gi.

  Kata ose bedo ni Ker ose loko toke ne oganda marwa kamano, kik chunywa tur nono mi mirima mak jowa. Nyaka wabed achiel kanyakla e riwruok machalo kaka ORI mondo omi wabed kod duol mojing moloyo to e seche machalo sani.

 An Owiti Jagem Siaya.


Wuod Gem wachoni ORI e yo ma wanyalo loyo godo kendo wakaw loch Kenya, koro jowadwa riwreuru e achiel kendo kik wadog chien kata matin, wuodwa ma waseyiero ema koro watero nyime Ker Moi to ochayowa kamano nyaka aa chon. Kik mano buogu dhingo iro ok e tedo kuon mago chal yamo ma kudho to chung’. Kenya en piny molony kendo Moi ok nyal chikowa ni wuod Kenyatta ema nyaka water. Jorabuon ok onego kaw loch Kenya kendo. Ka mano otimore to dongruok ma Nyanza odok chien ma loyo kaka en sani omiyo watem uru paro matut kaka wanyalo riwore kanyakla kendo water wuodwa e kom. Kata yot kata tek to ORI ema walando joka nyanam, aduoko ero kamano ne Sam Kotiende mane okelo rieko mar ORI (operation Raila IN)

Wuon Abila


 Moi wuod odongo ogoyonwa aband abedo kendo, To kata kamano owango' iwa ndi, to pod wapime kod ang'och tiang' kata oweyo mana ni siasa mare oyombowa to pod wan kode ei kenya. obiro winjo kendo obiro neno gik ma joluo duoke kendo timo. bende osechako winjo duoko mager to owuondore ni tinde ong'iyogo.

Dan Ochieng' Obunga


Yawa man Kisumo ywago opiwu malando kuom wach mane Moi owacho e thuolo mane odhi yawo ASK (show) ma Kisumo e kor juma mokadho. Ker Moi nomedo lero ni en owuod kaluwore gi demokrasia mar KANU en odhialo wuod Otike ni ema nyaka rit piny Kenya. Mago to oyuma ma kik wachike itwa, ato Moi donge nigi ombulu achiel kende! Ento obiro kwalo ombulu mar delegates 4000 nade momi wuod Mama Ngina.

Mig. Donde bende notam ni ok nyal bedo achiel kuom jogo ma laro kom mar Ker e kanyakla mar NAC nimar nyocha ok otero oboke mag kwayo thuolo kowuok e opis mar FORD K. Ani wuod Gem weuru hedhoru koula ma twenyo got, ok unyal loko pach mwachegi gin wasigu yie mondo uyier ng’ato achiel manyalo chung’nwa e yor laro kom Ker. Kik wachal jogo man gi rich loch to kare walando fupwa e nyim oganda ma moko.

Mogi aduoko erokamano ne Mig. Amolo Tinga kuom kelo kwe e dala mar Kisumo chieng’ ma nyocha tulo odwa wuok ka Moi bukore hedhore ka ng’ok rafuok ni nyofo-nyofo! Amolo bende nyocha oketowa e ler ni en bende obiro laro komno kata tek kata yot. Jaluo Malo, Jaluo kende...! Joluo telo moko luwe...!

Wuon Abila


Many uru jatelo wamany ngano matayowa. Raila nongeyo maler ni moi en ngano maja mibadhi kendo maokogeno joluo. Wan jogo maing’iyo mana tok ji , kata jaluo oromo to en obedo etok ji. Nyaka koro wanen mondo kik Raila witwa. Moloyo kawanyalo bedo gi teko mawanono paro mobiro mondi, kendo waneno kama wakete, ok ni owaga kinyi owachomano oromo.


Wuod Luo moro mane ok dwar mondo owach nyinge bende omedo wacho maler ni ka lemb ojogore gi awayo to ere gima omiyo pod wamoke titi…! Moi osewacho maler ni dala ma yande ichude milunde del ka en jalup Otike ema oduoke loch wang’ni to nosuny milunde gi riwi maliet ero mita oweni ber ber! Jorabuon rito loch ka guok ma rito biero mondo olwar! Mit ka gi gen geno Rowa! Ato aneno ni gini ogajore ka i dhiang’ moting’o chino, ludh bor, obo, chuny adundo, kedhno kod ma moko...!

An kaka kawuono anene nika Moi odagi ni jaluo ok oromo loch to kare wamany jomach; kaka Opande gi lange mondo oket tulo, kata kamano luoro ma an godo ni wan ma walosogi to ok wabi yudo chandruok; Dayo moti, nyithi kiye, mond liete gi jodongo moti ema biro yudo chandruok omiyo gini wadoleuru mana mos mak waolo remo.

Wuod Kenyatta sani mor ka japidi maito nang’o dho nyathi mokago nyuka. Rawerani chalo ajuoga moneno mand rombo, oore ka dho koo mang’we! Mit korom gi mak olwer.

Kenyatta noyako piny ma ok onego wuode bende bed ma mor ni odwa kawo loch Kenya, mano to duggi ema biro neno. Onego Moi par malong’o kapok oloso. Rawerani nyalo miyo jo-opposition bar jo-Kanu ndasi e yiero ma biro.

Mago to gi ma moko maok anyal ndiko sani nimar an gi wichkuot ni dipo ka dhoga oboth, gweno mane goro ok nyal kwan nyithinde, omiyo waterre mos ndalo chiegni mag ng’ado bura. Wach mogik dhine Moi wuod Odongo; Jaduong’ yie ikaw yweyo ndalo orumo, kama iluokori ok itwoye, apuoyo bende ok tony e oro ariyo, wang’ni to pek! Wakwayi mondo ibedgi dimbruok mar luoro jogo mantie e buo lochni. In kaka wuoro ok inyal hero nyathi achiel to ichayo ma moko; kare moko go to nyithi ng’a? Obong’o Nyakalaga mondo oriti e ndalogi mag yweyo.

Wuon Abila

Jaluo dot Kom


MEDWA PACHI: WuonAbila@jaluo.com

©2002, JALUO dot KOM