24.05.01

JALUO dot KOM

 od wadu

Penjo kod Duoko
PENJO:
Wuod nyar kabondo,
Daher mar penji ni to teko mag Lwanda Magere kod huma mar Gor Mahia negin 
teko moa kuom Nyasaye koso negi A kanye?

Tedman Aloo.

DUOKO:
Migosi Tedman Aloo,
Amor ahinya kayudo obokeni ma miya penjo kodok kuom teko mar jowa machon mane Nyasaye otiyogo mondo ofwenyrenua e yore mag honni to gi teko. Ka ne isomo andikona maber to ageno ni ne iwinjo ka amulo wach moro kanyo ni Nyasaye ne osefwenyore e yore mopogore opogore koa chon e kit joulo kata e honni moko mag piny. To endalo magikgi, osefwenyorenua kuom Wuode Makende maen Jawar ji duto Yesu Kristo. Ma e yie mar Jokristo.

 Kata kamano, mano ok dwa nyiso kata wacho ni Nyasaye ne onge e oganda Luo kapok ne wang'eyo wuodeni. En ose wuotho kod jowa pile ndalo duto to endalo mogik gi osefwenyore adhianja e wuode. 

Ma ema omiyo joma oyie kuom fwenyni kendo luongore ni Jo-Kristo nyaka dagi kaluwore gi puonj mar jawargi Yesu Kristo. Kwerewa ne nigi chikegi kendo ne nyaka gidag koluwore gi chike machon go. 


Kata kamano, chikego osechopo kare e wuowi mane obiro waro ji duto moyie kuome. En e Lwanda Magere masani konyowa e lwenje mathoth mag piny. En e Gor K'Ogalo manyalo duto kendo ma ok lo.

 Joma oyie kuome gin johawi. yie kuome tiende nang'o? En chako ngima manyien kaluwore gi puonj mare. En yie moriere tir kendo ma kende. Ok en yie mikiko mang'ato nyon ka to nyon kacha, onind tung' to onind diere. Ooyo, wang' yore ariyo notamo ondiek luwo.

Mano ok dwa wacho ni bedo ja-Kristo en we bedo jaLuo. Ooyo, en bedo jaluo ma ja Kristo. Tiende ni ang'eyo kaka Nyasach Kwerena osefwenyore e jawarwa Yesu Kristo omiyo nyaka achak ngima manyien ma ok tueya e weche moko machon mapod omonowa wan joluo dhi nyime. (Wechego asemulo e andiko mara mokalo). Nyasaye en Achiel kende. Ma ema omiyo joKristo ok oloko nyinge kane giyudo yie kuom Yesu Wuode. 

To Nyasaye achiel ni nyisore e yore mopogore opogore kaka chon e honni mag Lwanda Magere to gi Gor Mahia to sani kuom wuode majawar piny Yesu Kristo. Ma e yie marwa wan joluo-ma-jo-Kristo.

Ageno ni twak ni ochopo penjo mari kendo biro konyo jogo bende mane nigi penjo machal gi ma. Ero kamano. Nyasach oganda oriti.


An Okoth Gordon Wuod Nya-John.

Jaluo.com,

Amor ahinya kuom neno gi gima Joluo.com otimo...mar
kelonwa dot kom nyaka e dho rangach.
Med ngeche ariyo gi e dechwa.

Kinda e lweny; keto chuny kod sinani e gimoro amora ma itimo ema nyalo miyo ilo lweny, kata yudo nyak mar olemo. Kaok ibedo gi kinda to jo wasigu nyalo nyorou. Kata Opuk bende noyombo Apuoyo e ng'wech nimar ne gi kinda. Kik icha ng'ato kata otin kata onyap.

                              (Abich Ngeche, jaluo dot kom)



Jarikni jamuod nyoyo gi Kuoyo; pinyni opong gi masiche omiyo kapok itimo gimoro to tem nono, kik ine ni nyoyo koro oserenji koro imuode amuoda mak inono. Ngima itero mos. 

                          (Abich Ngeche, jaluo dot kom)

Aduoko erokamano,
An Mig.Jacob Ochieng Owuor
Dubai- UAE


Medwa Pachi

Inyalo ndikone jaduong Abila, Ajos wuod Atiga

Kata Nyadendi Akello Nyar Kager