manga200102

JALUO dot KOM

OD WADU
     
 

MANGA OROMO GI MAGARE E KOR NAM Jaduong’ Abila, Jaluo dot Kom

Mos mogundho ne nyikwa Ramogi kamoro amora ma untie, Abila kawuono ochacho; mokwongo daher mar kelonu wach kuom kend mantie e kind NDP gi Kanu kod lokruok moko matindo tindo ma koro osechako nyunjo e kindgi.

Sani koro en higni ma dirom ang’wen nyaka NDP yud kend gi Kanu. Asebedo ka atemo geyo weche moko kuom hera mane obedo e kindgi to yawuotwa moko yande wachoni iya lit gi riwruok madhi nyime; Ooyo en mana ka wacho adieri, nimar Ker Moi dwaro mana yor resruok kata tiyo gi Joluo kata bang’e to obiro bolowa ka pany kech kato omuochowa ayany ni ing’ewowa gi siling’ alufu abich (5'000) kaka yande osewacho kuom wach wuod Seda. Jomoko bende nowachoni, „tho...! Wang’ni to waromo g’Omoro, Loch ochoponwa, Tinga Malo!“ CITY bende wayudo! Kare mana kayiem. Manga oromo gi Magare e kor Nam, Ker Moi gi Raila yande oyiero yawuoyi moko ang’wen mondo onon wach kuom riwruok e kind Kanu gi NDP ato ka gweno pok omuonyo bando to Wuod Odongo odhi ochoko bura gi lange e boma ma Nyorobi, Buore Ka Pango mit ochako oloso maling’ ling’ mar oganda 17 mondo onon wachno maler kaka riwruok biro dhi nyime. Wachno nyocha omako dhowa kata mana owadgi Akinyi „Amolo Tinga“ Nyocha omako dhoge kaka okwer ema otame, nikech gisewuok mabor, mathoth bende osewachore, wichkuot bende lonyo tek!

Wach miwuoro ni Ker Moi ochwe oyiero Ajuoga (Dr) Njoroge Mungai kaka jakom mar burano, ato jasigu bende iketo mondo olos dongruok mar jasike? Wiwa pok owil gi gimane otimore Kisumo tarik 25.10.1969 ka wuoyini emane omuocho bunde ekind oganda mane ochokore e boma ma Kisumo, oganda mathoth mane otho moko bende noter e od ang’ech nikech piny owacho ok pingi pingre! Jowadwa ok adwar kelo sigu e kindwa gi jorabuon mak mana ni daher mar leronu ni sani koro ochopo kama wachomo mudho omiyo kik iwe yor ler! Rameny kik rwenyi mondo iluw bang’ jasigu morwako pien rombo kowuondi ni en ema obiro resi. Chako chon ber moloyo dhi ajuoga giri giri kata tin; loch rito tek kendo ochido, inyalo temo rite to kare oganda to osin kodi. Kik laro loch mi wawit yawuotwa madongo kaka nosetimore e loch Otike.

Akwayo Nyikwa Omogi ni mondo wariwreuru kik pogruok bed e kindwa, uneno ka pogruok ema omiyo ogandini moko nyierowa; yawuotwa moko bende koro oriwore gi mwache kendo gi konyogi ngado rieko kaka ginyalo yudo resruok. Orengo sani koro omakore gi mwache ma ok iyud kaka ikonyo. Ochuodho bende oramo ni kata tek kata yot to ok  olok pache nikech en ema owacho adiera. Omamo Kaliech bende sani owachoni oweyo ng’wech mar laro kom od bura e yiero ma biro. Sani yawuoyi koro osechako olo minyonge oko mondo omi yiergi e kombe kaka jolejiko kata kansila.

Nikech aneno ka Manga koro jajni ochiegni muoch kaka Nyiragongo bende osemuoch e piny Banyamulenge. Dhano ringo ka lot ma mol ka pi aora opong’o Goma. Daher mar weyou gi mago nikech pek mar piny omiyo ok anyal loso mathoth. Kuonde moko mach lietie piny wang’ kuonde moko to koyo nego ji, kuonde moko to mbom muochie kuonde moko to kech ema nego ji, mano omiyo sembe ipimo mana gi nyamin, koth mochwe ochok mabiro ema ong’eche derene. Nyasach Kwere mondo Oritu, Adikinyi Nyar Nam mondo Otau ndalo duto!

 Ajos Wuod Atiga, Jaluo dot Kom


© All Rights Reserved, JALUO dot KOM, 2002