masira220102

JALUO dot KOM

OD WADU

Masira Kindaki;

Jaduong’ Abila, JALUO dot KOM

Masira omuomo piny, dho ji nomoko e boma ma Kisumo kane oyudo gi ikore mar golo ringre wuodgi ma nyocha magoro otero. Wachni otimore e od kano joma otho (morgue), mar New Nyanza General Provincial Mortuary.

Anyuola mar mosenindo; Mig. John Otieno Ngara, mar Kagan Lokesen ei district mar Homa Bay (Asego) noyudo ochokore e dho kar kano del, kuom hawi marach ne gi rito ma gineno mana keth nyakeno. Jatelo mar odno nomedo leronegi niya; “Nyalo bedoni wuodu oseiki ga nyuola mar jago mane nying’gi ogwenyore godo, e thuolono noyudo jago moro bende otho e od twech mar Kibos ei Kisumo”. Jagono nyinge en John Otieno bende kaka wuod Kagan mane osenindo. Penj ma koro apenjora nito bende joma otho neno? To ka gi neno dak gisefwenyore ne oganda ma koro piny ogoyo nyang’engo? Koso jogo ma rito ute kano del bende tiyo gi wigi adier dak ne ginono pogruok e kind John Otieno mar Kibos kod John Otieno Ngara mar Kagan?

Wachni ok en gima nyien, an bende yande otimorena ka yande awito wuod minwa; Otieno Benedict “Alambo” wuod Kasipul, Kanyango sikul Nyahera. Kane ochopo ni wadhi golo ringer Kenyatta mortuary mondo omi water Chiromo to nokawowa thuolo ma bor mondo omi wayude, kare jogo matiyo e odno emane opande ni nyaka wanigi chung’ korka gi gole, Nyikwa Ramogi mano kaka ne aromo gi mak olwer; ochopo kama koro otera e dag oganda makwar mane otho nene nikanyo ema dipo ka ayudoe ringer owadwa; kare onge mano mana ketho seche, gin gi wegi ging’eyo maler kama okete ringer wuoyino. Na manyo motama kuom thuolo mane agoyo dho mang’angego bor nokawogi nyiriri (dakika) matin ahinya mondo omi gifweny Kama wuoyino nitie. Mano doko tim nyikwa Ramogi; ondiki kendo ichamo pesa mondo omi irit ringre jowadu mosetho, kuom hawi marach into iloko kanyo kar ohala mar mayo joma nigi lit minyonge ma gin godo, ani in bende kiny en mari.

Wakawo thuoloni gi jodong Abila duto mondo wakow mos mar kuyo gi lit ne anyuola mar mosenindo Mig. John Otieno Ngara wuod Kowino (Kagan) kod joodgi John otieno mane otho e od twech mar Kibos. Kendo akawo thouloni mar siemo mang’ange ma kawo pesa e ute kano joma otho ni mano en tim marach kendo wakuong’ogi e nying’ Obong’o Were Nyakalaga, Nyasach joma otho gi mangima kanyakla.

Wach machielo ma bende ochonwa kawuononi jariemb Nyange mar BODA BODA nyocha otuomore gi jawuoth moro ma otho gi kanyo, jago mane oyudo oting’o nyocha otur kendo pod en e od thieth, wakowo mos mar kuyo ne jo-Boda Boda duto. Mano nyocha otimore e gweng’ mar Lugari ei Kenya ma Imbo e chiro mar Munialo.

Nyange ng’weye mit to en gima nyalo kelo masira e sama tin ahinya; wachni parona gima yande otimore e chiro man e kind jo-Luo gi Abagusii mar Ruga (Eroga). Higa mar 1992 yande oyudo ariembo ndiga e ndara mowuok Koyugi ka achomo Eroga; ka gir kirage mihia moro noyudo owuok sikul kar saa onyango mit obukore okwayani kayie to mondo akowe dala jowetege oseyombe, mit ayie achungo Nyange, kane oseidho to ng’wech ochakore kaka ing’eyoni nyange suore e aridiridi ma piny oling’ mana tii! Kagir jachien ka wakayo machiegni daraja moro but Ruga to dawinj mana ka Nyange ogoyo orek (brake), mit mihia chande ema chak goyo nduru ma piny ochama nono nito mit ka anyono thuol koso ang’o motimore chien kanyo! Kare mihiano nowinjo kaka nyange suore ma mit mochako tugo gi tiend nyange ma chien kare kuom hawi marach tiende nodonjo e waya. Piny nochama kaka atimra otama kaka agol tinde e kind waya bende otamore. Mitne min mare chopo gi nduru awuoni mit obiro dhawo koda kare en bende piny ochame kaka owachi otame. Tiend nyathini ne poth kochot e kind wechego, hawi maber ne wagole kendo noyudo thieth ma ochango! Hap Ruodh Kwere notelone. Jowadwa mago kende e weche ma wayudo ei Abila kawuono moko mathoth pod wabiro kelonu, hap minwa Nyar Nam mondo ogwedhu uduto!

Ajos wuod Atiga Ny’Ochola

wuonabila@jaluo.com