|
NYUNGU OYIE SORO
Jandiko: Wuon Abila,
Mos mogundho ne nyikwa Omogi duto, en mor
mara mondo arwaku duto e DUOL kata obedo ni koyo osechamou kamano. Nyocha
pod antie e wuoth mar romo gi jodongo e piny LUO.
Nawuok piny Ulaya koni tarik 10.08.02 kuom hawi maber, ndege nomwomo yamo
gi sironyo maka piny ru tarik 11.08.02 to winyo opiyo Buore Kabwana.
Yawuoyi noromona miwuoro; Mig. Opiyo Okati, Adoyo Adoyo, Akach Oke
g’Abich, Okello Ndwallah Ja Bondo, Kevo Nyakwar Atiga Nyocholla (Nyamgondho
wuod Ombare), Okoth Okoth wuod Ochuonyo Kosele City, Jojo Ouma ja Usula,
Opas Fundi wuod Wich Lum Beach, kod yawuot Luo mak kwan kwanre noromona gi
mor miwuoro. Yawuoyi mane obago nduma gin kaka; mig.
Othorong’ong’o (Siyenga Dynamic), Owino wuod Adongo, Arito Ochimbo
K’Omollo, Dolla Kabarry, Generali Adwera Okello,
kod jobenga ma moko.
Bang’ budho Migwena (Kenyata market), to ng’wech owuok dhi Kisumo City
kanyo wayude wakeyni kaka; Adhis Lady Nyargi Rambo, Flo nyar Kabonyo Nduru
nam, Lady Babito, Aluoch Pamba nyar Alego Obambo kod ma moko. Klub
Oasis nopong’ gi yawuoyi ma kar bet di tami. Nduma nochwadore nyaka chee!
Wuoth owuok tich adek gi modhiambo kochomo Apoc Nyamasaria kanyo wayude
yawuot Kobura koyuoro budho math moling’ mos. Mos mos to wachopo Rabuor
kanyo orwakwa gi Lady Atie nyar g’Otieno Oyoo nyuol mbala, nyodo nyodo
ma kata inyuolo janeko to en mana dhano.
Kapok piny koyuso to wachopo Ahero City, kanyo orwakwa gi Nyamwaya JB
junior, Omori Rambo wuod Apondo, kod yawuot Kakola duto. Budho
nobagi River Side Bar, kanyo Dolla Kabarry nochwado nduma nyaka onyango.
Kamoro ka kamoro mane wabuore to jodong Abila ne choko duol moro matin.
Mano omiyo wayudo pach jopiny kaka paro. Mor nokikore gi ich wang’ nimar
ethuolono ema wuod Ragen ochake siasa mar akweda kendo mar achaya, nowacho
maler ni wuod Otike ema biro rito Kenya e ndalo mabiro.
Kiondko nomako joluo e piny ngima, bang’ mano yawuoyi mathoth osebedo ka
puko mogo e loch masani. Mig. Peter Odoyo wuod Nyakach bende nyocha oteng’
lwete mogo bang’ wacho ayangani obiro fulo weche moko mochido ma wuod
Otike nosebedo ka timo mondo jopiny oyud ler kuom rawerano.
Wuoth nochako dhi nyime kendo wachopo Gem Rae, kanyo orwakwa gi
jatweng’o ma ng’ula; Ajos Ja-Katito chot Aluoch Pamba gi Lady Agneta.
Orwa jasolo bende nonyisa mondo achop Kusa, norwakwa gi rwak malich
miwuoro.
Sondu ne wayudo Osito wuod Asembo ka budho gi welo mane obiro kweyo chunye
bang’ wito nyadendine mogeno Mik. Betty Nyar Ayoma. Wuoth ochomo Chabera
kanyo wayudo ka yawuoyi gi nyiri oriedo e ndara rito Wuon Abila gi lange.
Wachopo Kabondo gweng’ Agutu Dulo kanyo wayudo Paddy Ahenda kabudho
kendo opimo mbaka gi jodongo. Wuoth ochopo Achuna Ka Magak (Oyugis) kanyo
waromogi jodong Karachuonyo, Kasipul gi Kabondo mathoth kar rombgi. Budho
ochako otera nyaka Kamagambo Rongo kanyo wayudo ka ji dhogi omoko ywago
kokgi e dala joka Dawa. Malit osiko, mikayi morito dalano magoro okawo.
Kaduogo Oyugis to orwakagi Masanja Kosiro dhano siro wadgi gi ludh Nyasaye.
Nyikwa Ramogi weche thoth, kawuono daher mana mar nyisou ni aseduogo kendo
duol koro mor mor magenga koro osemoki, kik koyo chamu kayiem.
Ajos Wuod Atiga Ny'Ocholla
MEDWA
PARO: WuonAbila@jaluo.com
© 2002, JALUO dot KOM |