Kama Jaluo yude Joluo wadgi

06-23-2000

JALUO.COM

TEDO

NJUGU GI RABUON

GIK MA DWARORE
Njugu ma oswagi e pany
Chak mopoto
Mor dhiang'
Ratuon (Ok ochunore)

TEDO
Kaw chak mopoto
Riw gi njugu mayom moswagi e pany
Lung'gi e aguch tedo aye iket e mach
Rit ma chwakre
Med mor Nyaluo (Mor dhiang')
Ket ne welo gi rabuond nyaluo

perry AKINYI NYAR KATEG JERA

TEDO ALOT DEK

GIK MA DWARORE:

1. Alot dek mayom.

2. Pi maler.

3. Chak mar chieu [ma ok opoto]

4. Chumbi/ratuon/gir kado. [ok ochuno]

5. Mo mar dhiang'. [ok ochuno]

YOR TEDO DEK

1. Dond it alot mayom to KIK inga'di. [mondo kik alot bed makech.]

2. Ol pi ma oromo ei agulu/sufuria, bang'e iket e wi mach maliet.

3. Chwak pi ma yieny bang'e kaw alot inyum eiye.

4. Ti kod oliho/oludh kuon matin mar tedo alot, ka isinyo go alot seche duto ma otemo thulore malo.To KIK iloke seche duto ma ochiek. [ma temo duoko kech ne chien.]

5. Lok alot dichiel kende ka iparo ni ochiegni chiek.Med chwake mos nyaka pi rum.

6. Olie chak mondo ochwakre go kendo mos ka iduoko mach chien. Ka kado ose dok chien to inyalo ole mo mar dhiang' mana moromo ae to ichwako kuom seche matin kende to igolo oko kendo inyalo toko chiemo ni gi kuon kata gimoro amora ma diher chame godo.

DEK MA OKWOGI

7.Bang' ka ose chiek to inyalo mure pile ka iole chak kod mo mar dhing' matin nyaka chieng ma ineno ka koro alot ose makore kendo mit ae to inyalo chame kaka idware.

AN BETTY NYAR SUBA.

Tedo Nyoyo
Kawuono ahero puonjo yawa man loka piny wasungu tedo nyoyo. Ang'eyo ni nwang'o oduma kod oganda samoro osemono yawa man loka mang'eny tedo nyoyo. To kata kamano nitieye kaka inyalo timo ma ited nyoyo mamit mana machiegni gi ma dala.

1. Dhi e duke madongo mag chiemo mondo inyiew odumb ondelo ma odiero dendo ni popcorn. Oganda motuo bende inyiew. Inyalo yudogi ka otwegi e jwala mar ratil achiel kata ariyo.
2. Kaw oduma aye ibidi e pi ka pok idhi tich kata kapok inindo mondo obidre seche ma bwora.
3. Law oduma gi e pi mang'ich aye iketi e kendo mondo ochiegi kuom seche ariyo. Sama oduma chiekno to bid oganda bende e pi mang'ich.
4. Bang' seche ariyo to law oganda bende aye iolie oduma man e kendo. Seche gi bende inyalo pere chumbi moromo ewi nyoyo. Dhi nyime kod chweko kuom saa achiel kendo kata nyaka oganda chiegi.

Nyoyo kose chiek, to koro tok atoka, mondo inyam gi nyuka, kata chai. Jo kapango bende ma dhoggi mit nyalo chiele mana kaka ichielo ringo. Alot bende inyalo riwe.

Loso Chak
Ka ne asomo thurwa Ugenya, ne iwewa ga saa auchiel sama jopuonj dhi chiemo ni wan bende wadhi wagagi. Seche mang'eny ne wabet ga mana e tie yien moro e skul ka warito mondo saa aboro ochopi mondo wadogi e klas. Samoro ka ne an gi otonglo na moro ma adiyora godo to ne anyalo nyiewo niang' anyam. To samoro ka kech ne obemba ahinya, to anyamo ng'wech nyaka dala, mondo miyo omiyae gimoro anang'. Chiemo mane mora ga ahinya ka ayudo ne en kuon gi chak moa e ko ka pok opuo.
Tinde adak mabor gidala, to chak gi kuon to pod ahero ndi. Kuon to ang'eyo ni uduto ung'eyo tedo, kose? Koro adwaro mana nyisou kaka dilos chak ma mit ma chiegni mana chalo gi chak moa e ko.
1. Nyiew 100% lambjus (100% concentrated lemon juice).
2. Kaw chak mang'ich moa e frija aye iol e glas kar moromi madho. Per lambjus moromo kijike ariyo madongo ewi chak.
3. Medie sukari moromore gi milmili mar dhogi. Rude chuth.
4. Weye dakika ariyo kata adek mondo opotno.
Koro yuom ayuoma chak gi kuon kata gi rabuon ka iyudo.

An Akelo Nyar Kager

NYUKA ABAGI
(mok bel kod kal)

( rapim moromo ji ang'wen)

GIK MA NYAKA IBEDGO

     mok bel ( nus agwata matin)
     mok kal ( nus agwata matin)
     pim pi moromo agwatni abich manie diere
     ratuon (sukari) moromo

YOR LOSE

1. Ket mogo ei agulu matin mar bago nyuka (kimbo mar jwala), ketie pi moromo kendo irude kod oluthkuon (oliho). Ume kato ikete kama mormor kuom odiechieng achiel, ndalo ariyo kata adek luwore gi kaka idware.
2. Bang'e inyalo chako rude kod oluthkuon kendo imedie pi matin, chwak pi e sufria manie diere, ole e pi mose chwakore maliet, kochakore kanyo to koro irude nyaka ine ni ochako poto, mano nyalo kawo thuolo maromo dakika abich kod dire ka ineno kopoto ahinya to med pi matin, ket sukari kaka diher. Onego madhe ka oliet kata ka
ondhem ndhem.

( Adhiambo Nyar Kano Kochogo)

BULO AGOKO

GIK MADWARORORE.

*Agoko Diel, kata agoko Rombo, kata Agoko Dhiang' kaponi idwaro agoko mabup manyalo yieng'o jokwath k' okwodo.
* Yiend kang'o motwo (mboto) kata chuk mach madhedhni , apilo kod chumbi.

BULO
Pedh agoko gi kabund iye e wi sing'nge ka yien osewang' ma olokore chuk. Bang' ka agoko osebulore gi kabund iye, loke gi ka dier ng'eye. Eseche ma obuloreno, ema bende iporoe chumbi. Ka ok idwar poro chumbi, to inyalo budo chumbi e
okombe. Inyalo tiyo kod chung bel. Ling' chung' ei okombe to ka chung' osenyodho pi chumbi to kir pi chumbi no ewi agoko ka nyidho. Kik ikir mang'eny ma nyalo nego mach.

* Ka ineno ni agoko osebulore moromo maok rengni kaka otwo, to gole mapiyo. Rit okwe mondi kae to ichak kenge. Bang' ka ise kenge, nginj apilo gi lith lweti matindo tindo kae to ikir ewiye. Ka ihero to bende inyalo kengo nyanya mochiek makwar bende ewiye kanyo. Pi olemo mar ndim bende inyalo biyoe matin mar medo ndadho. Chame kod kwon to en heroni kata jo chiemo mamoko bende. Kwon ma ichame go bende en heroni. Inyalo chame kod kwon kal kata kwon bel. To kata kamano kwon kobali mit kode ahinya.

ODHIAMBO WAYOGA
(Nyakwar SEKO gORWA)

Ngat man kod yor tedo moro ma diher puonjo ogandawa bende damor ka ondiko ka