Dwoko penj Mig. Lyston Dibo kuom wach Tero dhako gi tieko kweche bang’ tho wuon pacho

Akelo nyar Kager,
 
  Mokwongo, daher mar moso joluo duto kamoro amora ma gintie, bende amosou kendo atimonu erokamano uduto jogo ma timo chenro machalo kama ni joluo e piny mangima.
  
Antie gi penjo to daher mondo dwoko bende oorna e yor e-mail nikech aonge e Kenya omiyo ok anyal winjo e Radio Ramogi.
   

1. Penjo mokwongo (1): Babana notho higni ang'wen mokadho to minwa ne ok oter nikech oware. Owadwa maduong’na bende otho bang’e to en bende jaode ok noter to gin gi nyithindo masomo?

Nasegero simba to podi ok akendo. Koro kadwaro kendo nitie rach moro kata chik manyalo luwo koso?

Dwoko penj mokwongo (1)

Wuon Abila:Ka babani notho to mamani ok oter mano nyiso ni owadu kane otho to oyike ka minu nigi kode, mano kwero maduong’, mar ariyo k’owadu otho to yuori bende ok oter mano richo mar ariyo.

Kuom mano nyaka ter mamani mokwongo korka inyalo ter yuori eka wechego inyalo losi e yo makare, ka miyo pod nigi nyithindo mapok ogoyo dala to onge kaka onyalo tamore ma ok tere nikech oware.

Mag piny itieko mana e pinyka, mag polo to onge kaka inyalo riwo gi chike jopiny. Kaka jaluo nyaka iluw mana chike kwere mokwongo. Kapok ibedo ja-Kristo to ikwongo ibedo Jaluo mano omiyo Luo kitgi gi Timbegi ok inyal weyo kata dichiel. To kadipo ni idwaro mag Kanisa to dhi penj jodolo.

Kata jodolo bende ok nyal tieko kweche Luo mane kwere oweyo e pinyka. Gima onego mamani tim bang’ tieko kwer mar ter, nyaka omadh manyasi mar pacho kanyakla ka yuori bende oseter korka oyawoni yore ma moko kaok kamano to dalano obam.
  
  2. Penjo mar ariyo (2): Bende nitie chik manyiso ni nyaka jaod owadwa ter to an bende anyalo kawe koso? Nikech an e wuod wuonwa mantie to owadwa oweyo nyithindo mayowuoyi to podi gisomo. Koro ka kendo anyalo gero ot e dalawa kanyo koso?

Dwoko mar ariyo (2)

Wuon Abila: Ee..! Jaod owaduno inyalo tero nikech in e wuoyi matin, mak mana wuoyi maduong’ ema ok donj e od wuoyi matin. Kata ka diponi owadu nosegoyo pacho to in pod in e simba korka ok inyal tere.

Kuom mano nyaka yuori kwong’ yud ja-chod kode korka inyalo tere. Gima nyalo moni tere en wach mar ng’ado rangach nikech wuoyi maduong’ gedo e bat korachwich to wuoyi maluwe to gedo e bat koracham mano miyo ok inyal ng’ado rang’ach idog bathe koma chielo. Kata kamano inyalo mana rite kaka chi owadu ma koro odong’ chi liel.

Rito nyithi owadu to ber mondo ikaw ting’ mar ritogi. Bang’e kikendo to inyalo mana gero ot e dalau kato bang’e inyalo goyo dalani. Gima duong’ nyaka yuori maduong’ wuog e dala korka in bende inyalo goyo dalani, mak mana kitere to inyalo wuok kode igoyone dala. Kanyo ema in bende inyalo kete chiegi minyuomono.
  
  3. Penjo mar adek (3): Nenore nabiro kawo ting’ mak’owadwa, to kapo ni adwaro golo dalana bende anyalo dhi gi nyithindogi kata kod min’gi to ne ok otere?

Dwoko mar adek (3)

Wuon Abila: Kaka aselero malo kanyo inyalo kawo ting’ yuori gi nyithinde kendo igergi kaka idwaro mak mana ni nyaka itiek chike kaka dwarore. Kapok oter yuori kata kaok itere to onge kaka inyalo kawe idhi igone dala, mano kwero ma kaka inyalo ose onge.
  
  Erokamano
  
  An Lyston

- - - - - - - - - - - - - - - - - - - - - - - - - - - - - - - - - - - - -

Wach mogik Mig. Dibo kain gi penjo moko kendo to inyalo orona e nonro mar Wuon Abila: WuonAbila@jaluo.com kata orne Akelo Nyar Kager e nonro mar: jaluo@jaluo.com wabiro temo miyi dwoko kaka nyalore. Kata kamano in bende miwa pachi kuom wechego duto.

Nyasach Kwere mondo otelni ndalo duto kendo ler mar rito chike Kwere orienyni ndalo duto! Adikinyi minwa mondo omenyni yore kendo omiyi rieko mar mako chike Kwere.

Wuon Abila