12-28-2000
SIGENDNI LUO
WINJO WACH LOYO BOR IM (ROMBO) GI MIT
"Omera Okolo, ere kaka in dendi opuch kendo yom?", Ogwal
nopenjo Okolo ka ne oyudo siso mar dend Okolo mane opuch ne olombe gi
ber sidang.
Wach puch mar dend Okolo ne en gima lee duto mane mol gi bund igi e
lowo kendo mane wuotho elowo motwo ne ok nyal tamore ngang'. Gi duto
ne giyie ma onge akwede ni okolo pesa ne oloyogi gi ber.
"Nyaisoda adwani mondo iwinja eyo makare, kendo chik iti ka pok
achako pimoni wach". Okolo ne odwoko Ogwal bang' koseling' kuom
nyiriri(dakika) manok. "An ahero miyo ji duto adiera mopondo kuom
ber mar denda.
Ne ayude nono mane ok ang'iewe, to bende ne ang'iewe nengo matek. Ne
akawo thuolo makende kane achiko ita mondo awinj wach nyamrecha,
omiyo adiera mopondo man kuom ber mar denda kod chia man godo en
mana winjo wach, 'winjo wach loyo kata bor im gi mit'".
Ogwal bang' paro kuom kinde matin ne openjo Okolo ni "to winjo
wach doko adiera mopondo ngang!", "Miya wach gi gond iye ka
iyie miya adiera man kuomi".
Okolo nodwoke ka kone niya "Jayadha chik iti, kendo anuoyoni ni
ka ok iwinja maber to kik iywag ang'e bang'e!"
Bang mano okolo nochako miyo ogwal sigana mopondo kuom chia mar dende:-
Chon gilala kane pod wan mihia matindo kwarwa maduong'
ema ne otweyonwa bilo maber mar chia. Bilo ne ong'iewo omenda mathoth
kuom achiel kuom ajuoke mane oa nyandwat ma tuch chieng'.
Kane pok wan rowere ma nyangweru, ne okonewa ni mondo wadhi e
dho wath aora maduong' mane opogo tongwa to 'kod ochung' tir' (dhano).
Edho aora kaa emane ochako timonwae thieth mar chia. Ne osaro kor
bondo gi pand ong'ayo mane en godo kendo ne oriwo gi remo mar nyadiel
mapod onge songa kaeto....'
"Ogwal duogi, Ogwal duogi.........!" Okolo nogoyo koko matek
kane oluongo nyaisoda mane oyudo oseweye bang' winjo mana ondamo manok
mar timo liswa mar bedo gi chia.
Gima ne lit ne Okolo ahinya en ni Ogwal dende dhi kethore chuth, to
kata kamano ne osetimore, kendo Ogwal noyombe mapor putu!
Okolo noweyo wach Ogwal mana gi kanyo kowacho e chunye ni "fuwo
onge yadhe!"
Kane Ogwal ochopo edho aora mane Okolo opimone ne osaro bondo mit oolo
mana chag bondo kuome ngany' ngany'. Gikanyono dend ogwal nopokore
modholre malich. Ogwal noywak sidang' ka salulu oromo dende.
Bang' kinde manok dende notwo to gi songa mane odong' kong'akore.
Songa man e dend ogwal pod inyalo neno nyaka kawuono kendo pod gigolo
chak ka ituome matin kata mana gi kede.
Jothurwa, wabed joma winjo wach! Dine ogwal dimbre mos mowinj wach
dine obedo mana gi chia kaka Okolo, to rikni mane engo nomiyo omwodo
nyoyo gi kwoyo.
" WINJO WACH LOYO BOR IM GI MIT "
Jagoro en Arreddo Nyang' Kibaa Ramba (arreddo.nyang@mailcity.com)
homepage: http://www.frednyang.homepage.com
Ka in gi mari moro ma di wandik
ka to orni
Akelo,Nyar Kager
jaluo@jaluo.com
Daher winjo dwondi in
bende, iwinjo?
