"onere e debe", jopiny onyiso jokom orindi.

Ripot moro ma nyocha ogol gi migawo moro ma iluongo ni International Republican Institute(IRI) bang' timo nonro e Kenya mangima koro oseyango ni jopiny ojok gi ng'eny jout bura mekgi. Owacho ni jopiny chano riembo e tich wabunge 114 kuon 210 ma wango, gi e sani.  Achako anuoyo ni gi e sani to nikech nonro kaka mar IRI ni nonoga pach ji mana gi e sechego kendo giongega gi jing'o ni paro gi biro siko kaka gin e seche mag nonro no. To kata kamano gin ga rameny mabeyo moromo e pimo kuma yamo dokie kinde ka kinde.

Ripot ma nyocha odend gi dho Ngere ni "Views on the State of the Country and the Government" ni nyocha olos bang' nono pach jopiny e weche mag yiero maduong' mokayo higa manyien, bunge mar ochiko ni, buche mag
siasa, mibadhi to gi weche fwambo gi keyo gi thuolo mar golo paro. Nonro wuon notim dwe mar auchiel tarik apar gi abich nyaka apar gi aboro.

Jopiny ne oyango ni wajumbe 54 ewi miya giriembo e tich. Weche ma ne gichiwo ne ma ne gin barruok dhi e od bura, medruok osara aoyaye, dhi e yweyo ding'eny to gi bedo ni ok giti matek( kaka e kalo Bills). Magi bende ne omiyo ji 47 ewi miya owacho ni bunge masani ni osetimo marach ahinya e tijgi, nyiso ni giserem. Ji 8 ewi miya kende ema ne oungo bunge ma sani ni lwedo.

Wach ma chielo ma ludo i jopiny gi wabunge ahinya en mar cdf. Kata obedo ni jopiny mang'eny ahinya ong'eyo wach mar cdf kendo ne oriwo lwedo paro mar miyo omede, ng'eny ji ne ok mor gi kaka itayo pesani. Ji mang’eny paro ni mibadhi ochuo chieng’ e kaka itayo cdf wuon to gi chenro ma otayo e gwengegi.

To weche mibadhi gi ok omako mana gwenge kende kaluwore gi pach jopiny, kendo ji 64 ewi miya nowacho ni chakre telo ma sani ni kaw loch, weche mibadhi osemedore  kata dong’ mana kaka ne gintie ndalo loch machon, e sirkal. Kendo ji mogwaro neno ni duoko mag nonro ma otim kaluwore gi weche mibadhi sirkal ok bi luwo.  Ji ma paro ni sirkal ok bi nono matut weche
mibadhi ma piny kae gi chalo kama: Anglo leasing 71 ewi miya, owete mane oa Armenia kande  69 ewi mia, Goldenberg 68 ewi miya to ripod Ndungu mar wach lowo 65 ewi miya.

Kata kamano ji mang’eny moromo to neno ni sirkal masani ose temo tiyo maber  kendo ji 55 ewi miya opuoyo tij sirkal ka ipimo gi ji 32 ewi miya ma neno ni sirkal osetiyo marach, to gi ji 12 ewi miya ma ne onge paro e wach tij sirkal ma sani. Bende ji 47 ewi miya oyie ni sirkal osetimo maber e chopo singo mane gichiwo ne jopiny e kinde mane gisero  ombulu. Ji 38 ewi miya to okwer ni ooyo ngang’, singo pok sirkal ochopo.

Jopiny bende neno ni ka saa yiero oromo to buche mag siasa onego riwre( coalitions). To kuom gigo ma jopiny gombo ahinya gin ni sirkal omi ji tije, oked gi dhier, olos uchumi  kendo oked gi mibadhi bende. To mogik kendo mane omora ngano to en ni jopiny orito goyo ombulu gi siso kendo kar rombgi. Pach jopiny ok amedie gimoro da. Amiyo u luor mogundho.

Nyasaye ogweth nyikwa Ramogi duto te!
Adhiambo Nyar Kanyamuot.