TWAK E KIND NYAR SIGOTI KOD WUON ABILA

Nyikwa Ramogi Ajwang' wach masani yilo it jopiny en nito bende ber mondo ojende okaw loch ei Kenya koso nyaka gikonyre gi Otikriri kaka Ajos wuod Atiga gini? Riwri kod e twak kendo imedwa pachi bang' somo sechegi.

Nyar Sigoti: Penjona en ma, gitelo ne ojende wetene koso ne jii duto?

Wuon Abila: Telo mar piny en mar ji duto ok en mar Ojende kende, kendo onge kaka ginyalo telo ne jopiny ka ok giriwore gi jodongo manyalo ng'ado negi rieko. Onge ng'ano mong'eyo duto jaduong' dwaro pach oganda, ojende bende dwaro pach kamano! Ok yot mondo Ojende orit piny kendgi mak jodongo omiyogi gweth gi paro mar rito piny. Ojende mane watero e od bura maduong' (Bunge) oledhi osemako kendo gimer gi loch ma ka ok ong'adnegi rieko to gibiro miyo piny bedo gi chandruok.

Nyar Sigoti: Jothurwa, tend ojende ok rach to onego wapenjre ni gin ojende ma hikgi rom nade? Kaka sani yawuoyi matindo manyo oyier e yiero matin manyocha otimore mogik gi onge ber kata achiel motimnegi ka gipacha. Kaka wuod Murugi Kariuki mane somo oko mar Kenya, pok ochako kata mana family ne en owuon!

Sani en gi tabu ahinya yiero kata osiepe maradier nikech ng'eny osiepe mabiro biro ire gin mana joma dwaro tiyo kode. To kata ka sane mar keny ochopo, be obiro yuto nikech en ng'ama en koso nikech en jatelo. Thuolo manyocha omi yawuoyi gi dhi mayogi kinde mar enjoy their youth age, nitie gimoro kanyo ma omagi maok yot mondo gibi giyud kendo.

Wuon Abila: Ojende matindo nigi chandruok to jodongo bende chandruok omako, omiyo chandruok omako ji duto. Ndalo moko mokadho nyocha Mjumbe moro oyakore adhong' gi rawera moro ma goyo Ohangla e boma ma Kisumo, Mjumbeni to ok koro tin ruok, kata kamano otelo ne oganda koro inyalo luonge ni jaduong', kuom hawi marach luor oringo owuok kuome omiyo weche odiro adira ka sanjuri mano bende doko tim?

Miyauru dwoko joka Nyanam! Od Bura bende ka gidhiye bende ok gibed mos omuom margi giwegi ema gitemo lose kendo medo rang'iny ma malo mondo omi gimew, to jopiny omed chandore. Koro mano ere kaka wanyalo gero piny ma jodongo gi joma tindo mondo oyud tiegruok gi lony! Thoth jotendwa osomo e pinje maoko mano to ok rach, mak mana thothgi onge gi paro mar gero piny moloyo to kuom ojende ma tindo man e Od Bura Maduong'.


Nyar Sigoti: Aparo ni yawuoyi matindo gi onego yud lemo marom kodgi. Wuoyi kata osomo mana marom nade to wuon mare pod nitie to ok obed wuod dala. Miyo ojende telo ok rach to mana mondo gitel ne ojende wetegi. Youthful leaders opogore gi youth leaders ma nyocha wayiero ka. Ojende kik bed gi araka, ndalogi biro, to joma oti ahinya bende kik twere e telo gibed jochiew paro to joma onego otel mandalogi ni kare ka aparo kendo ka aneno e pacha, to onego bed ekind higa 25 nyaka 60, bang'e to gidhi giywe to jomatindo be orit gibed ripe for leadership.

Wuon Abila: Ojende onego ti gi jodongo kendo gi konyre ng'ado riekni mopogore opogore, jodongo bende okonyre g'ojende mak mana higa mar ng'ano moro bendo jatelo to onge en mana ni ka en wuoyi moseromo kendo to koro onyalo temo riwore gi jodongo kendo okonyre gi pachgi, jodongo bende kik cham ma thoye gimoro ka gimoro nigi gikone, jodongo bende onego dhi ywe ka ndalogi mag yweyo oromo. Moko kosedonje telo to ok dwar weyo; Joka Bimbe sani ok dew kata mana jogo mane okonyogi ka giyudo loch, moko to ojony ma kata wuoth tamogi.

Loch ber gi joma tindo to mana ka gikonyore gi pach jopiny, jodongo bende ber gi loch mak mana ka gin gi paro manyalo gero piny, to giko bende nyaka bedie. Mago to gi ma moko ma ok walose Nyikwa Ramogi medwauru pachu un bende, mano eka wanyalo wero pinywa.

Hap Nyasach Kwere mondo otau ndalo duto. Adikinyi, Nyar Nam mondo omenyni Piny, Obong'o Nyakalaga, Ngire mondo Siru kuom masiche mag gombo momako Ojende gi jodongo motamore weyo loch!

Wuon Abila