GOYO MUMA EN ANG'O?

PENJO:
Anne Okelo:  penjo ni
GOYO MUMA EN ANG'O?

Amosou ahinya nyikwa nyanam, kendo amor ahinya kod website ni. To an tiere gi penjo moro matin. Asebedo ka awinjo dholuo moro ni goyo muma. Be de uyie ulerna tiend wachni, To timo gik machal nade ma inyal wach ni ngato ogoyo muma, to muma aina mane ma nyalo timore ekind dhako gi chwore, to bende nitiere yo ma inyal kony go ka ngato ogoyo muma. Yawa nyikwa anjwang, akwayou ni mondo upimna wechego. Aikora mar tedo to weche mangeny ok angeyo to de agomb mana loso oda ka opo ni saa ochopo.

GOYO MUMA EN ANG'O? Uriti uru jokama
An achiel kuom
  Anne


DWOKO:
Wuon Abila; Goyo Muma en ketho chike Luo kata timo timbe moko ma ok ochomo kare.  Nitie timbe moko ma ok ber ka ng'ato timo e chike joluo. Kata sirikal bende nigi chike ma oketi maok onego kethi. Ka ng'ato oketho chik to itere mana e od ang'ech.

Chike Luo bende mana kamano. Ka ng'ato otimo tim moro ma kwero to iwacho gi dholuo ni ogoyo muma. Timbego gin kaka; Dhako ogoyo chwore gi nyathi, dichwo onindo gi nyare, rawera nindo gi watne (nyamin mare, nyathi owadgi), Miyo onindo e od wuode (simba), jaduong' olonyore duk e wuode konyise kama nonyuolego gi ma moko. Timbe ma chalo kamano gi ma moko nyaka madh manyasi.

Weche mandiko malo kanyo moko gin kweche moko gin goyo muma tiende ni timbe maok ochopo kare e chike Luo wanyalo wachoni gin goyo muma kendo nyaka madhie manyasi korka resruok nyalo bede. Nono to nyaka tho wuogie. Kata midekre ema nyalo donjo e pacho.

Madho manyasi tiende ang'o? en e yo ma nyaka puodhgo jogo mosetimo masira kata ogoyo muma. Mano chalo kaka Od ng'ado bura kendo iyie gi richoni kisingori ni ok inichak itim gino kendo. Jo-din to kwayo ng'wono kuom Nyasaye, jo-Katholik to luonge ni Pentinisia (Repentance) en timo singruok gi Nyasaye e nyim jadolo kendo ijok gi richoni ni ok ichak itim gino marachno kendo.

Pogruok e kind madho manyasi gi Pentinisia en ni Jo-Luo ka ng'ato otimo richo
(goyo muma) to nyaka opuodhre gi nyawadgi mane gi kethogo. To Pentinisia to
iyudoni ng'ato dhi ir jadolo kende mak okawo nyawadgi mane gi timogo richono.

Wuon Abila