Gero simba kata loko?

From: David Kabaka

Penjo:

Amoso jo abila,

Penjo ma an godo chalo kama:

Baba nikod mon angwen. An wuod dala mar agwen mama na e maduon'g. Owetena Ariyo osegolo pacho to maluo bange to podi. An ne asegero simba (kiru) mara bange to ot ogore pinye ka pok a donje kod jaot!, Koro agombo gedo kendo koro a tim nang'o? Owadwa maluo ban'ge bende pok oloko ot nyaka ne oger simba mane onyombe to pende oonge mpango mar loko machiegni. Baba na owar bende weche gi ok olu kadwa n'geyo chikegi koro weche gi chanda.Yiuru mondo ukonya.

Dwoko:

Erokamano wuod Luo kuom kwayo mioronwa en wach maber mondo imany rieko seche ma weche omoko matek kaka sani, in wachni ok tek dog iger ot kamane isegede motelono, kato idonje kaka simba, bang'e inyalo donje gi jaodi, kata owadu miluwo pok oloko simba mano ok moni gedo! Babani to wuondore gi weche mag lemo nimar kaka ang'eyo kendo asebedo kawacho en ni mag piny itieko gi chike Kwere. Nyis wuoru ni idwaro gero simba kama yande kiru mokwongo ogore piny. Kodagi to ket bura gi jodong' anyuola.

An mag polo ok anyal lose nikech pok adhi kuro, kata kamano Nyasaye to mar ji duto! Chike Kanisa noketi gi jo-Israel to jo-Israel wegi bende rito mana chike Kweregi koro wan kaka jo-Luo ere gima monowa rito chikewa? Onge ja-Israel marito chike anyuola machielo kata matin.

Mogik yie ilos gi oweteni madongo mosegoyo pacho kendo inyisgi gima pachi dwaro kendo gin bende ginyisi kaka gineno! Mago ema aweyigo kain gi penjo to inyalo penjo, anatem dwoki kaka nyalore wuod Nyanam!

Mogeni,
Mig. Ajos wuod Atiga Ny'Ochola
Wuon Abila, Jaluo dot Kom.