Maro otho dala ore itimo nade?

Penjo:

Kaka wuod Luo Migosi Odhiambo Omollo ja Kamagambo olero wa e weche mag dholuo mamit kamano, Dahere mar penjo joluo wa ni itimo nang'o ka mari otho e dala ni? Maro obiro ka limbe ka nyare kaeto tuo di goye ma ohatore mana kanyo kanyo e od nyare. itimo nade kata chike mage ma joluo nyaka lu?

Elisha Obongo,
Technical Support
Compucom

Dwoko:

Ka maro otho dala ore chalo mana ka thuol odonjo e ko! Loko dhochni tek kendo ka ok olose maber to onyalo rundo dalano chuth. Gima itimo en ma; ikawo maro kendo ikete e kom kochalo gima obet piny e kom kendo iting'e gi joma odok kore kendo iyiecho kor chiel kuma igolego oko mar dalano, mak mana irito nyaka piny imre nimar ok onego jopiny ng'e gima osetimore e dalano. Ywakne bende ok go e dala nyare. Kaka piny masani to inyalo many nyamburko moro mikete mondo otere thurgi. Kochopo machiegni gi thurgi to itero wach ne jodalagi ema koro nyalo kawo chike mag liel.

Gikanyono or mane masira otimore e dalane manyo yor manyasi mar pacho mondo kik gibed mogak kuom gima osetimore e dalane. Kuom ndalo manok to odno imuko oko. Mak mana epiny masani to koro obedo matek ka diponi en od kidi. Kata kamano manyasi ema inyalo hosgo jodalano. Penjoni ochalo managi wach moro ma yande otimore Achuna Koyugi ka maro noyudo owendo nyare mit ochwe ong'ielo orengo gi midhiambo, wachno nochando jodalano mane otimore ni gin jo-Adwen ma ok luw chike jo-Luo. Kata kamano nochunogi ma nyaka gitimo kaka chike Kwere dwaro. Mig. Elisha Obong'o ageno ni iyido dwoko kuom penjo mane ioronwa kaka inyalo tim ka maro otho e dala nyare. Kain gi penjo moko to inyalo oronwa mondo watem dwoki eyo manimba.

Mogeni,
Mig. Ajos wuod Atiga Ny'Ochola
Wuon Abila, Jaluo dot Kom