08/08/2003
WECHE MOKADHO
JEXJALUO ****
;
Nindo tinde otamore tera, to ka anind matin ni, to lek ochope. To gin lek mana ma dhi nyime, ma kama nyoro orume cha ema ochakore kendo. Juma mokadho cha to ne anindo maber, to anyalo paro ni nitiere lek mane aleko mang'eny ma ogajore ogajore mit ok anyal pimo gi malong'o. Kata kamano anyalo paro ni Raila ne osiko bedo e lekgi. Koro chakre wuoktich kogwen, abedo ka aleko lek ma ok lal e pacha. Dana ni Nyamasaria kanyo, nyinge to Rosa Obado, jaod Mumbo k'Othuon. Ne oja lokona ga lek ka ne pod atin. Ng'at modak machiegni ominae dana lekni, mondo olokna tiende. Kata ka ing'eyo jalok lek moro to yie imiye mondo iduogna tiende.
Wuoktich otieno: Aleko ni team mar mpira mar Gor Mahia goyo mipira e stadiam Nairobi. Team ma gigochogo to ok awinjo nyinggi mak mana ni jal miluongo ni Saitoti ema en jagondgi. Mpira ochacho. Onge team mose loyo. Odong' dakika matin to opira rumo. Agwambo, ma gocho ne Gor ni kod mipira. Orie godo dho gol ma ja gol kende ema odong' nyime. Ka no om fua ni odhi chwado dabal ma jo Gor ose kwano ni gol, to nyathi moro manyako luongo karingo donjo e pap ni "Raila eri pi modho mane ikwayo". Mit Agwambo owe mipira ka dhi kawo pi modho. Aye okawo agwata kuom nyathini. Ka noter ni oketo e dhoge ni omodhni, to Oyugi Hezekiah opore ma ogoyo agwata sut mobarore, konyiso Agwambo ni "Nyathi, ere kaka inyalo modho ka pok amodho". To agwata obarore ma pi okirore kuom jogocho te. Koro jogocho te mag team machielocha olokore tong' madongo dongo madirom gi tong nyang', to jogocho adek bende e team Raila bende olokore tong'. Raila gi jogocho aboro mar team mare ema odong' dhano kod difri.. Difri to en Martin Bita, ma en jaUgenya mosiepna ma ne wadak godo Thika. Mit lek orumo kendo achiew ka Raila siemo gi lwete ka okwano tong' man e pap.
Tich ariyo otieno: Nindo otamore tera nyaka kogwen. Lek ochakorena kendo mana kuma nyo orume nyoro, kama nyathi nyiso Raila ni okelone pi , kendo otimore mana kaka nyoro ma Oyugi obaro agwata, ma Raila koro kwano tong'.
Aye tong'gi ochako barore ka achiel achiel. Tong' mokuongo barore jaduong' Kenyatta ema owuokie, mar ariyo jaduong' Kibaki owuokie. Mar adek Jaduong' Moi owuokie. Mar ang'wen Saitoti owuokie. Jogi duto ka gise wuok e tong' to giwuotho mana matek kendo askari oyawonegi dhot maduong' mar stadiam mit giwuok e stadiam ma gilal nono. Tong' ariyo kendo obarore, ma okelo Wamalwa gi Muliro ka biro ir Raila. Sa mathin to helikopta ochopo ma okawo Raila kod Wamalwa gi Muliro. Ei helikopta ka ginwang'o Biwott gi rawera moro ma ok ayango. Aye Biwott miyo gi Chai gi kitumbwa. Ka Raila kawo kitumbwa ni diket e dhoge ni to Muliro othalo lwet Raila ma kitumbwa ong'injore matindo tindo. Aye jogi duto olokore tong' kendo mak mana Raila kende. Mit achiew.
Nyoro tich adek: Kendo nindo othaga mana nyaka kogwen. Lek ochakore ka Raila ni e ndege , otemo riembo ndege to otame kaka orieye. Bang'e oneno denge moro nyime, kendo owinjo ka duol wuok e spika mar ndege ni, "Ndege ma iriemboni odonjo e pinywa, lu bang'a mondo anyisi kama ipiye ndege. Aye oluwo bang' denge machielo nyaka opiyo. Ka owuok e ndege to ng'ama okuongo romogo en Oyugi. Oyugi penje ni, "Thuon to kara ma ne mana in? To dak nyocha inyisa ni ibiro?", aye Raila duoke ni "Telo wuodhni opore, ne ok achano". Sa matin to Muliro bende ochopo, aye omiyo Raila otiko mar gari konyise ni, "Wuoru owacho ni kik ichiem kang'ato nyaka ichop Sakwa. Ofukuni otin'go thamos mar chaye kod rabuond nyaluo, gi njugu mochiel, ne Ida okeloni. Magi kende e chiembi nyaka ichop Sakwa'. Saa matin to gari ochopo. Kendo ka no om ni odonjo e bogi man e nyime to oneno ka ji abich opong'o mesanokendo gi metho. Saitoti gi rawera manyocha nitiere e ndege kod Biwott ma ne ok ayango nyinge cha obed ka ngiyo dhod gari, kendo gigwele ni odonji mondo obed kodgi. To ji adek ma oloko dier ng'egi ka loko wigi ng'iyo ng'at ma igwelo to gin Otieno Ambala, Horace Ongili kod Mboya wuod Ndiege. Mboya chung' aye mino ngum kendo owito bade matek ne Raila ka osiemo ne Raila gi luete mathuon, kendo gi kwinyo, ni okadh piyo odhi e wi gari nyime. Bogi mar ariyo bende ka Raila omo ni dhi donje to onwang'o Ouko kanyo, gi Hagai Wasuna, kod Joel Omino. Gin bende gisieme mana gi kwinyo ka gigoyo koko ni "Ring idhi e bogi ma nyim gari". Mit achiew ka Raila pod ringo dhi e wi gari.
Gik ma andiko pinykae gi, amedo gi ni ponono ni jalok lek nyalo nwang'e gimoro ma konyo kuom loko lek.
1. Jumapil ne abara dhi lemo. Ne amadho chai moa India gi tost mowang' mowirie siage. Odiwuor ne amadho nyuka mar mok nyamula. Otieno ne achamo ringo moregi moru gi ng'or mong'adi ka pok ochiek, karot, kod ochele. Ne achako nindo saa abich otieno.
2. Wuok tich ne amadho chaye moa India gi muogo moa India. Ne ok achamo lunch. Otieno ne achamo chiemo ma oriyo ma ne achamo jumapil. Ne adhi nindo saa abich gi nus.
3. Tich ariyo ne amadho chai moa India gi mandas. Saa lunch ne achamo alot manumu (salad). Otieno bende ne achamo alot manumu mokikie gweno moregi. Pi bende ne amodho mang'eny. Wiya ne bara matin ma amuonyo aspirin. Ne anindo saa abich.
4. Tich adek ne amadho chai moa india strungi. Saa lunch ne ok achamo gimoro. Pii ne amodho mang'eny. Otieno ne achamo gweno moted gi nas, sukuma kod kuon nyamula. Ne adhi nindo saa abich gi wiye.
5. Ji ma alekogi duto ng'enygi pok arado go ri, anenogi mana e picha. Mak mana Hagai Wasuno kod Joel Omino ma anyalo paro ni ne aradogo ka pod atin, nikech gia gweng'wa. Martin Bita mosiepna bende kaka ne ase nyiso ni ne wadak kode Thika higni piero ariyo gi wiye mokadho.
6. Anindoga ka wiya osiemo imbo
Jolok lek konya uru gi rieko!
Odundo jaKarateng'
Ka in gi mari moro ma di wandik ka to
orni
Akelo nyar Kager
jaluo@jaluo.com
Daher winjo dwondi in bende,
iwinjo?
Inyalo oro twak kod weche manyien ne: Mig. Ajos wuod Atiga
WuonAbila@jaluo.com
GALAMORO : Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.