JEXJALUO ****
Konyo Luo Nyanza!
Nyikwa Ramogi Ajwang' mos mogundho buroni e tunge piny kuonde duto ma untie,
koda in Kiseru od dhawo; "BAGHDAD" kata in Jerusalem Amoyo piny Obwere Kabwana
kata in kama nade to piny chalre! Ajos wuod Atiga ema twaro kaen Achuna City,
Kasipul Palace.
Aduogo jomoko nyocha oweni alal en mana ni nyocha adhi wanyo e loch Kibaki
mondo opogna lemo to awuok nono; omiyo daher nyiso yawuotwa man oko ni kik
item ka iweyo tiji ma iseyudo e pinje ma oko kaka Amerka kata Ulaya ni dipo
ka iyudo moro ma ndham ndam kaluo, mano to ipuko mogo! Kibaki sani ok dew
jopiny. Kata kamano wan joluo to wang'iyogi chandruok ma ok ema okuongo. Otike
otiyowa ang'aya, wuod Odongo otieko jowa sani bende koro Kibaki obukore, sani
to wan UNBWOGABLE.
Kuom wach konyo LUO NYANZA moloyo boma ma Kisumo anto adagi nikar konyo miyo
jokiyaka gige tich to kare wakony mine gi nyithind kiye. Matoka mar mach
sirikal ema onego ng'iew ok jopiny; ka kamano to kare onego ombulu mar yudo
pach raia ni ka yot to wabedgi FEDERAL government moloyo rito gigo ma Okuche
laro. Wabiro chandore nyaka kar ang'o? Obell Nyanja owuoyo kuom konyo boma
ma Kisumo, Atoti yuor Odundo mikayi Awino Rayier bende osirone anto akwedo
kendo akwedo wach mar konyo bomano chuth nimar onge kaka wanyalo golo kony
ne jogo ma ok oyie tiyo gi jopiny.
Jomoko bende nyocha wayieroni Wabunge mago to ema ich lach olal godo oko,
gi goyo ombulu e od bura maduong mana mondo giyud geche ma giringo godo, medo
masachgi, bedo gi ngima maber to raia mane oyierogi to chandore. Lojni chal
managi mokadhocha. Ochalgi jakuo moyudo batiso konyume e pi to owuok ka en
jakuo ma ng'ich bang'e to ochako okwalo kosetwa. Omiyo joka nyanam paruru
malong'o kapok wachako konyo dongruok man kaluo.
Mago to gi ma moko pod abiro medo twak bange.
Ajos wuod Atiga
***************************************
NILOTICA RESEARCH CENTRE
Jaduong' Abila; Ajos wuod Atiga
E-mail; WuonAbila@jaluo.com
info@jowopaonline.ch
http://www.jaluo.com
http://www.jowopaonline.ch
Ka in gi mari moro ma di wandik ka to orni
Akelo,Nyar Kager
jaluo@jaluo.com
Daher
winjo dwondi in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.