08/04/2003
WECHE MOKADHO
JEXJALUO ****
;
Jandiko: Wuon Abila
Kaka yande aselero wach kuom Keny daher mar chano kaka weche nyalo bedo eseche ma igonyo ne wuoyi dho Keny to gi joma nyalo gonyone, gima inyalo tim ka ochopo ni koro dak tek kendo nyaka wer, tiende ni Keny okethore.
Mokwongo jogam ariyo nyaka winjre e weche mag keny. Jagam Nyako gi jagam wuoyi. Joluo yande owachoni jagam dhoge ariyo; mano adier onyalo loso keny kama kido rache. Mago keny mane ok nyal dhi nyime maber.
Kendo jagam wuoyi bende ne temo nono thurgi nyako kod anyuolane duto. Mano ne ok mon nyako ma kite rach yudo dichuo, jajuok ne nyuomo jajuok wadgi. Jakuo, janek, jabilo bende kamano.
Ka weche duto osetieki; wuoyi ne chano kaka onego oter dho keny thurgi nyako. Janyuol wuoyi, owadgi, nergi gi nayuolane moro amora ne nyalo gonyone dho keny. Kata kamano kane ochopo ni keny okethore to dhok mowar ok duoki ne jagonygi, gin dho wuoyi mane kenyne okethore. Ok riwgi gi dho dala iriembogi kamoro nono.
Kawuoyi oriembo nyako nikech kite marach bang' dak kode. Wuon nyako dong'gi roya mar pien kane en nyako ngili mane pok omak bade.
Ka nyako onyuolo wuoyi to odong'gi dhok adek. Nyako to odong'gi dhok ariyo. Kuom hawi marach ka nyako osenyuom gi ng'at machielo to wuon keny mokwongo rito nyaka wuon keny mar ariyono kel dhok eka imiye.
Ka nyako onyuolo wuoyi e simba nyathino ok nyombi e dalano, nyamin min mare nyalo kawe kaka nyathine kendo kete edalane, nyako bende kamano, wuoyino igonyone dho keny e dalano, nyako bende kanyo ema ikele dho keny, nimar kwaro ok nyal chamo dher okewo.
Dhok mane ok terie Keny
1. Dhiang' magumo
2. Rapilu kata opilu
3. Othuondo
4. Ruath ma mande ochiel
5. Dhiang' monyuol gath
Dhogegi ne ok ter e keny nimar negi nyalo kelo hawi marach e keny.
Wuoyi (kata nyako) otho kapok oter dho keny
Koda nyako ema otho kata wuoyi ema otho kapok oter dho keny, jodongo ne kumo ywak nyaka chopi ter dhok thurgi nyako. Kendo ok oyiene jonyombo mondo opor wach moro amora kuom tho nyargi kata wuodgi.
Ka jonyombo oseduogi eka imuocho ywak. Kaen kama chiegni to giduogo ogalko, ka en kuma bor to ginindo achiel kende. Bang'e eka ioro joma dho omo jothurgi nyako. Kata samoro bende ne inyalo muoch ywak kato ioro joma dhi omo jothurgi nyako kendo kapok oyiki to gioro jonyombo gi dher lihungulu, dheno iweyo ekor yo kapok gichopo thurgi nyako e kor yo kamoro, ng'ato kwanyo.Gin e dhok molal maok yud wegi.
Kata ka winjruok owinjore e kind jodalagi nyako to wuoyi yiko nyako kaka osiepne eka bang'e oikore mar dhi nyuome; otero diel gi dhiang'. Kendo inegone gwend or. Mano netimore nimar wuoyi chieng' moro nyalo dwaro tero dhok e keny dhako machielo, ka ok otieko chike dhako mokwongo to kare manyien bende ok onyal tere gimoro.
Ka wuoyi ema otho to ka pok oyike to jodala golo dhiang' minyuomo nyako. Mano nyiso ni en chi pacho. Kendo bang' mano onyalo bolo lop chwore. Bang' tero buru imiye wuoyi moro ma pok okendo ema tere odiechieng' moyike chworeno. Bang' mano ok chak ywag chwore kendo, wuoyino ema chung' kar chwore motho. Bang'e ka ohero kendo to onyalo anyala kendo onge kwero.
Hap Nyasach kwere oritu ndalo duto Nyikwa Omogi!
Mogenou Mig. Ajos wuod Atiga; WuonAbila@jaluo.com
Ka in gi mari moro ma di wandik ka to
orni
Akelo nyar Kager
jaluo@jaluo.com
Daher winjo dwondi in bende,
iwinjo?
Inyalo oro twak kod weche manyien ne: Mig. Ajos wuod Atiga
WuonAbila@jaluo.com
GALAMORO : Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.