08/27/2003
WECHE MOKADHO
JEXJALUO ****
;
Ngero mar,
"Kinda ki teng' ne omiyo opuk ogwaro nyar min kirowo"
Tiende en ango?
An Grace Ochola
Dwoko; Kinda ki teng'a ne omiyo opuk ogwaro nyar min kiroro/kirowo tiende ni
rito gi kinda ber to onego obedie gi gikone, rito thole nyalo miyo masira
wuogie. Min Kiroro/Kirowo norito gaming'a ma opuk oweni koso nyar min Kiroro
en gago mit otemo mule ane gi koke. Chal gima min Kiroro/Kirowo nobedo
angewa mit opuk oyudo thuolo mar chopo kuma duong'ne nitie.
Penjo mar ariyo;
Wuon Abila, ka wan jowuowi ariyo e dala. Wuowi mokuongo pok ogolo pacho, en
gi dhako to pok onyuome (osetero mana ayie kiling ling makata miyo monyuole
ne ok ongeyo-wuoro ose nindo) to wuowi mar ariyo dwaro nyuomo chiege, ere
gima ditim nikech chal ni wuowi mokuongoni pesa oolo oko ma oneno ni sane
pok oromo mar tero dhiang.
To bende wuowi matin nyalo goyo pacho otelone mokuongo? Nikech weche tinde
ngeny e piny ok ingeyo gima nyalo timore koru kata kor nyako.
Dwokauru ewachni nikech aseneno ng'ato mokuongo goyo pacho ne omere
maduong.
Nyakwar Ogutu Nyandiga
Dwoko mar ariyo;
Ayie moter ling'ling' chalo pesa ma omosogo maro en ok kwane, ayie bende ok
en dher keny mano pok onyombo. Wuoyi mar ariyo ok nyal tero dho Keny ka
wuoyi maduong' pok otero. Temuru mondo uket bura e dalau kanyo gi anyuola
mondo jodongo okonyu loso wechego an ok anyal loso mano nimar anyuola ema
nyaka rie dalagi giwegi. An anyalo mana ng'ado rieko kende.
Kuom goyo dala nyocha asewuoye inyalo somo weche mokadho kuom goyo dala,
kata kamano wuoyi matin ok nyal kuongo ne wuoyi maduong' goyo dala, mak mana
ka ochuno to odhi ogero kiru moro to ok oket rangach, dhode bende oketo
ariwa kaka simba.
Nyakwar Ogutu, ere gima omiyo ipenjo penj ma in gi dwokone, dak idhi ipenj
kaka jogo notimo mondo inyiswa nimar dala ka dala nigi wachne. An ok adwar
wuondi ni ber mondo wuoyi matin nyalo goyo dala ne wuoyi maduong'.
Mago duto to gi ma moko amedo duoko erokamano ne nyikwa Ramogi kuom kinda ma
giseketo mar penjo weche machando chunygi. Mano eka wanyalo medo gero dhowa
gi chikewa. Atimo mos ne jogo ma barupegi pok ochoponwa nikech TIMBE MAG
AJIENDEKE MA JO-AMERKA DWA THIROGO OGANDA LUO, eseche ma aloseni piny owacho
mar Amerka otamowa kuom yudo oboke mondik gi dholuo. Wuod Bungu onego ywa
wiye malong'o nimar loch ong'enge norumo chon.
Kaok kamano to onego BUSH okaw thuolo gi joge mar puonjore wacho dholuo
mondo kik gipar ni nitiere wach moro mopondo e mbuyi mar jaluo dot kom.
Joluo ok gin joge Osama kata matin. JO-Amerka nigi mbom to joluo to ong'eyo
diro sanjuri, ORUJRE, omiyo wuod bungu onego lok pach ka weche pok obedo
maricho.
Kwe kende joka nyanam!
Wuon Abila
Ka in gi mari moro ma di wandik ka to
orni
Akelo nyar Kager
jaluo@jaluo.com
Daher winjo dwondi in bende,
iwinjo?
Inyalo oro twak kod weche manyien ne: Mig. Ajos wuod Atiga
WuonAbila@jaluo.com
GALAMORO : Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.